Ali N. Aziz I علي عزيز

والله ما أدري وش اللي قاعد يصير! أمس إساءات لعُمان، واليوم إساءات للبحرين، وقبلها لدول ثانية! يا جماعة الخير، هل فيه أحد يحاول يجعل السعوديين في عداوة مع الجميع؟. أنا هنا أخاطب السعوديين تحديدا. ترى مو كل حساب يظهر موقعه السعودية يعني صاحبه سعودي، فيه حسابات منتحلة، وفيه حسابات مشتراة، وأصحابها يتكلمون بلهجتنا، وفيه جهات معادية تستغل مواقع التواصل لإثارة الفتن بين الشعوب. ولا أستبعد وجود حسابات مرتبطة بجهات إسرائيلية أو إيرانية أو غيرها تحاول تأجيج الخلافات بيننا وبين جيراننا. والمشكلة إن بعض الجهال والمندفعين ينجرفون ورا هالكلام، ويصيرون من حيث لا يشعرون جزء من المشكلة. وخلونا نتكلم عن البحرين تحديدا. يا إخوان، الرجل الحر الأصيل ما يمن على أخوه إذا ساعده، ولا يقعد يذكره بوقفاته معه عند كل خلاف! نعم، السعودية وقفت مع البحرين وساعدتها، وهذا واجب الأخ مع أخوه، لكن لا تنسون إن أمن البحرين من أمن السعودية، وإن وقوفنا معها كان أيضا حماية لأمننا ومصالحنا. تخيلوا لو أصبحت البحرين تحت النفوذ الإيراني، هل هذا في مصلحة أمن السعودية والخليج؟ طبعا لا. يعني وقفتنا مع البحرين ما كانت منة على أحد، كانت وقفة أخوة، وفي الوقت نفسه حماية لأمننا جميعا. والبحرين أهلنا، وعُمان أهلنا، وكل دول الخليج أهلنا، وإن كان فيهم حسابات تسيء لنا، ففيهم أضعافهم يحبون السعودية ويحترمونها. وإحنا لنا قيادة نثق فيها، ومواقف دولتنا واضحة، وما نحتاج حسابات مجهولة تعلمنا من نحب ومن نعادي. يا جماعة الخير، والله عيب اللي يحصل. فكروا بعقولكم، من المستفيد من تصوير السعوديين وكأنهم في خلاف مع الجميع؟ خلونا نحافظ على محبتنا لأهلنا وجيراننا، ونوحد جهودنا تجاه التحديات الحقيقية، وفي مقدمتها الحوثي والمشروع الإيراني في اليمن. لا تنجرفون ورا كل حساب، ولا تعطون أحد فرصة يزرع العداوة بيننا وبين أهلنا. حفظ الله الجميع من كل مكروه 🙏