ريما الرويلي🇸🇦

#رسالة_من_القلب: «عز نفسك تجدها» يا كثر ما قلنا «عادي» و في خاطرنا كلام .. ضحكنا عشان ما نضيّق صدور اللي معنا .. و رجعنا لبيوتنا متضايقين .. نلتمس العذر لهذا .. و نراعي ظروف هذاك .. و ننسى إن لنا خاطر مثلهم .. يتعب و يحتاج أحد يراعيه. عز نفسك .. ترى لك حق في الطيب اللي تعطيه .. من حقك تلقى من يسأل عنك .. و يسمع لك .. و يفرح بشوفتك .. من حقك تكون مع ناس ما تشيل همّ مكانك عندهم .. و ما تحتاج كل مرة تثبت لهم إنك تستاهل المحبة. إذا كلمة جرحتك .. قل «هالكلمه جرحتني» .. و إذا تعبت .. قل «تعبت» .. لا تكتم كل شي خوف على علاقتك بأحد .. لين يجي يوم ما عاد لك خاطر حتى في الكلام معه .. عط اللي يحبك فرصة يفهمك .. و عط نفسك حق إنها تنسمع. الناس تغلط .. و انت تغلط .. و بين الأحباب عتب و سماح .. لكن إذا شرحت وجعك .. و تكرّر نفس الشيء .. لا تجلس كل مرة تقنع نفسك إنك حسّاس زياده .. بعض التعب يطول لأننا نستحي نقول «كفايه». و ارفق بنفسك على اللي فات .. لا تلومها كل ليله على ثقة عطتها .. أو محبه ما لقت قدرها .. خذ من اللي صار درس .. و خلّ باقي عمرك لشي يفرّحك .. لقعده ترتاح فيها .. و ضحكه من قلبك .. و ناس تكون معهم على طبيعتك. عز نفسك تجدها .. تلقى ضحكتك اللي غابت .. و نومك اللي صار يقطّعه التفكير .. و رغبتك في أشياء كنت تحبها .. شوي شوي ترجع لك نفسك .. و تحس إنك تستاهل تعيش مرتاح. و مثل ما تقول لغاليك «ما يهون عليّ زعلك» .. قلها لنفسك .. و هالمره خلك قدّ كلمتك.

#رسالة_من_القلب: «من بغا الدح لا يقول أح» إذا غلطت .. لا تجي بعدها تعلّمني كيف أرد .. صاعك أردّه صاعين .. و ثلاثة .. و أربعة .. بالطريقه اللي تريحني .. و تعيشك في عالم من الرعب. انت اخترت الإساءه .. و انا أختار طريقة الرد .. و دامك ما حسبت حساب ردي .. لا تنتظر منّي أحسب حساب فضحك.