القراشي

الناس المستغربة من ضرب المسيرات الممنهج لمحطات الكهرباء ومصادر الطاقة، والناس البتلوم في الجيش ليل نهار.. هل أنتوا متخيلين حجم الحرب دي بالجد؟ الحقيقةإنو بلدنا دي بتواجه في عدوان دولي وإقليمي غاشم وممنهج. دي حرب ممولة بمليارات الدولارات، تمويل عالي وخيالي وفوق ما أي زول فينا يتصور! القصة ما قصة متمردين شايلين كلاشات، القصة شبكات إمداد، واستخبارات، وغرف عمليات تكنولوجية بتديرها دول وعقول أجنبية عينا على تدمير السودان. الجيش السوداني ما كان مقصر، لكن الحقيقة إنو مافي جيش نظامي في المنطقة بكون مستعد لعدوان من كل الاتجاهات وفي نفس الوقت! بلدنا بقت محاصرة ومطعونة من كل حتة، الإمداد والراعي الرسمي (الإمارات) شغال ضخ مالي وعسكري بلا توقف. الحدود مفتوحة لتدفق السلاح والمرتزقة من ليبيا، ومن أفريقيا الوسطى، وتشاد. والتحركات والضغط شغال من جهة إثيوبيا وجنوب السودان. لما الحرب تجيك من 5 جبهات، ويكون المدد البشري والتكنولوجي والمسيرات الانتحارية المتطورة دي داخلة ليل نهار، دي ما بتبقى حرب داخلية.. دي بتبقى حرب وجود وتفكيك لدولة كاملة وبنيتها التحتية. كلامنا ده ما دفاعاً عن حكومة ولا تبرير لأي تقصير، انتو عارفين الفيها وعارفين البير وغطاه. لكن دي الحقيقة الصادمة القاصدة المواطن السوداني في رزقه، وفي بيته، وفي استقراره. القصد هو عقابك أنت وتضييق العيشة عليك عشان تطفش وتنزح وما ترجع لبيتك تاني. الموضوع ما هين، والبلد بتمر بمنعطف تاريخي محتاج مننا نفتح عيوننا كويس ونعرف العدو الحقيقي منو. ربنا يحمي السودان وأهله الصابرين، وينصر الحق ويثبت أقدام الشرفاء. منقول من صفحة وسن على