🇵🇸 آلاء

انا مش متأكد من مشاعري تجاهه عبدول السيد، ولكن بتمنى له كل نجاح طبعا في معاركه هناك. أما بعد، موضوع التعامل مع مصر باعتبارها كائن بيحس ويزعل ويتكسف ويشعر بالعار، معضلة لأني كمواطن معرفش ايه ممكن يخدش حياء مصر أو يزعلها؟ وهل مصر تشعر بالعار لما الأفق السياسي يكون فيها مغلق تماما امام شبابها، ولا لما حد من ولادها يقول ده؟ ولا لما أي حد من بره يقول ده؟ وهل مصر بتاخد على خاطرها لما نقول ده في القاهرة ونيويورك، ولا نيويورك اكتر؟ وهل مصر بتزعل من الكذب؟ ولا من القمع باسم زعلها ؟ ولا من الحقيقة عشان الجيران ما يكلوش وشنا. بعد اذنك يا مصر يا حبيبتي، ردي عليا انت بنفسك بلاش المتحدثين باسم قلبك المكسور، وبختك المايل. انت بتزعلي ليه لما حد بيقول فيكي زبالة، أكثر من لما بتزعلي من لما يكون فيكي زبالة اصلا. عمليا، موضوع "كنت هبقى سواق تاكسي زي اهلي" سؤال مهم، وفي دراسات علمية ممكن تؤكده، وممكن نسأل نفسنا كمصريين مش داخلين انتخابات مجلس الشيوخ: هل يمكن لطفل مولود في أسرة أقل دخلًا أن يحصل على تعليم جيد، وشغل عادل، وشبكات وفرص، بحيث لا يظل وضعه مربوطا بوضع أسرته الأصلي؟ ده السؤال الصعب اللي محتاجين نجاوبه بصراحة، ومن غير خوف من زعل مصر.