Bilal Altaf

بزرگ نذر محمد کو سپریم کورٹ میں وکیل کی تلاش — اے وحید مراد پنجاب کے ضلع نارروال سے تعلق رکھنے والے 74 سالہ نذر محمد سپریم کورٹ کی پارکنگ میں ملے، پوچھ رہے تھے کہ آپ وکیل ہیں؟ بتایا کہ نہیں۔ مسئلہ پوچھا تو بتانے لگے کہ: میرا کیس بغیر سُنے خارج ہو گیا ہے کیونکہ وکیل کو ہارٹ اٹیک ہوا، وہ پیش نہ ہو سکا تو عدم پیروی پر عدالت نے فیصلہ کر دیا، اب مقدمے کو بحال کرانے کے لیے کوئی وکیل دیکھنا ہے۔ رات کو گھر سے روانہ ہوا تھا، رات گئے کی بس میں لاہور سے یہاں پہنچا ہوں، بس میں ہی ایک بندہ ملا جو سپریم کورٹ میں نوکری کرتا ہے۔ وہ یہاں تک بھی لے آیا۔ صبح چاہے ناشتہ بھی اُسی نے کرایا اور اب یہاں بیٹھ کر انتظار کر رہا ہوں مگر کافی دیر ہو گئی ہے۔ (دو بج چکے تھے)۔ فائل دکھائی تو اُس پر وفاقی آئینی عدالت کے جسٹس حسن اظہر رضوی کا مختصر حکم نامہ تھا کہ عدالتی عملے کے مطابق اپیل کنندہ کے وکیل اور ایڈووکیٹ آن ریکارڈ دونوں کو موبائل فون پر سماعت کی تاریخ کے حوالے سے میسج کر کے اطلاع دی گئی تھی مگر وہ حاضر نہ ہوئے، اس سے لگتا ہے کہ اپیل کنندہ کو مقدمہ آگے بڑھانے میں دلچسپی نہیں تو خارج کیا جاتا تھا۔ یہ کیس پہلے 21 اور بعد ازاں 28 اپریل کو آئینی عدالت میں سماعت کے لیے مقرر ہوا تھا۔ وکیل کو گزشتہ برس اگست میں پنجاب انسٹیٹیوٹ آف کارڈیالوجی منتقل کیا گیا تھا۔ اُس کے بعد سے وہ وکالت نہیں کر رہے اور گھر میں بستر علالت پر ہیں۔ (یہ بابا نذر محمد کے ہاتھ میں موجود ڈائری سے معلوم ہوا)۔ کیس میں ایڈووکیٹ آن ریکارڈ بھی فوت ہو چکے ہیں جنہوں نے مقدمہ سماعت کے لیے مقرر ہونے پر وکیل کے پیش نہ ہونے کی صورت میں عدالت کو بتانا تھا یا خود پیش ہو کر اگلی تاریخ لینی یا براہ راست اپیل کنندہ نذر محمد سے رابطہ کرنا تھا۔ اپریل میں خارج ہوئے کیس کا نذر محمد کو اکتوبر میں معلوم ہوا۔ اُس نے گزشتہ ماہ لاہور میں سپریم کورٹ کی رجسٹری سے عدالتی حکمنامے کی تصدیق شدہ نقل حاصل کی۔ اور اب سپریم کورٹ کی مرکزی عمارت پہنچا۔ نذر محمد کی ضلع نارووال میں 31 کنال زمین ہے جس کی تقسیم اُس کے مطابق ٹھیک نہیں ہوئی۔ وہ کہتے ہیں کہ ماڑی (خراب) مجھے ملی، تے چنگی (اچھی) چچا زاد بھائیوں کو مل گئی ہے۔ زمین تایا کی تھی جس کی اولاد نہ تھی تو وراثت ہمیں مل گئی۔ تقسیم پر اعتراض کیا اور ریونیو بورڈ (محمکہ مال) کے افسر اور چچا زاد بھائیوں کو فریق بنا کر مقدمہ دائر کیا۔ وہاں سے خلاف فیصلہ آیا تو ہائیکورٹ چلے گئے۔ وہاں سے بھی فیصلہ خلاف ہی ہو گیا تو سپریم کورٹ میں اپیل دائر کر دی۔ یہ سنہ 2018 میں دائر کی تھی۔ اس کے بعد گزشتہ برس وفاقی آئینی عدالت قائم ہو گئی۔ نذر محمد کا مقدمہ بھی وہاں منتقل ہو گیا مگر اُس کو کسی نئی عدالت کا علم نہیں۔ مقدمہ آئینی عدالت نے خارج کیا ہے مگر عمر رسیدہ نذر محمد سپریم کورٹ کا ہی بتاتے ہیں کیونکہ انہوں نے اپیل وہیں کی تھی۔ عدالت کے فری لیگل ہیلپ لائن پر کال کی تو وہاں سے بھی اُن کو کہا گیا کہ کوئی وکیل کر لیں مقدمہ بحال ہو جائے گا۔ سپریم کورٹ کے فیسیلیٹیشن سینٹر گئے تو بتایا گیا کہ تین بجے تک وقت تھا اب کل آئیں۔ کل (13 اکتوبر) کو پاکستان کی وفاقی آئینی عدالت اپنے قیام کا ایک سال مکمل ہونے پر جسٹس امین الدین کی سربراہی میں جشن منا رہی ہے۔ بلاول بھٹو نے کہا تھا کہ نئی اور آئینی عدالت کے قیام سے عام لوگوں کے مقدمات کی سماعت میں آسانی و سہولت پیدا ہوگی۔ اس نئی عدالت پر ایک سال میں لگ بھگ 11 ارب روپے قومی خزانے سے خرچ ہو چکے ہیں۔ بابا نذر محمد کہتے ہیں کہ وہ بڑی مشکل سے 2500 روپے میں بس کا ٹکٹ کر کے یہاں تک پہنچے ہیں۔ اُن کو کس طرح سمجھا جائے کہ جسٹس امین الدین کی ماہانہ تنخواہ 45 لاکھ روپے ہے۔