مــــيرا 🕊️ྀི🇸🇦

هل فقد الشريك هو أصعب أنواع الفقد؟ خصوصًا إذا كان شريك مثالي؟ وهل ممكن توقف حياتك إذا فقدت شخص كنت متوقع إنك بتعيش معاه باقي عمرك؟ شخص كان جزء من يومك وتفاصيلك وأحلامك، وفجأة تلقى نفسك مضطر تتعلّم تعيش بدونه..! 💔 فيلم Love of Your Life طرح هالأسئلة وخلاني كمشاهد أعيش مع الشخصية كل مراحل الفقد من الصدمة وعدم الاستيعاب، لمحاولات التماسك وإقناع نفسك إنك بخير، للتخبّط والضياع.. لا أنت قادر تتجاوز، ولا أنت قادر تظل واقف بمكانك! الفيلم ما وقف عند الفقد، بالعكس، ورّاك اللحظات اللي تحس فيها إنك بديت تتعافى وتكمل حياتك، وفجأة يرجعك الحنين لنقطة الصفر😔 البطلة كانت واقعية لدرجة حسيت كأني معها فعلًا، أعيش صراعها وأشوف كيف تحاول تلقى نفسها من جديد بعد ما فقدت الحياة اللي كانت تتخيلها🥲 أكثر شي لمسني إن الفيلم ما صور التشافي كأنه طريق مستقيم، ولا التخطي كأنه قرار تاخذه بيوم وليلة وتنتهي مشاعرك بعدها !! ورّاك كيف ممكن تفقد جزء من نفسك مع الشخص اللي فقدته، وكيف تحاول تتأقلم مع واقع ما اخترته، وتتقبل إن بعض الأشياء مهما تمنيتها ما راح ترجع أحيانًا أصعب شي مو غياب الشخص نفسه، قد ما هو غياب الحياة اللي كنت متخيل إنك بتعيشها معاه🤎 رسالة الفيلم بالنسبة لي إن التخطي مو إنك تنسى، ولا إنك توقف تشتاق! بالعكس، إنك تتعلم تعيش رغم الغياب، وتسمح لنفسك تبدأ من جديد بدون ما تحس إنك تخون ماضيك وذكرياتك، وإنك تقدر تفرح وتحب مرة ثانية💗✨ مو لأن الشخص اللي فقدته صار أقل أهمية، لكن لأنك بديت تتصالح مع الفقد ومع الحياة بدونه🤍 من أجمل الأفلام اللي تكلمت عن هالشعور بالنسبة لي.. فعلًا، التشافي الحقيقي مو إنك تتجاوز الشخص، قد ما هو إنك تتجاوز فكرة إن حياتك ما راح تستمر بدونه.! وإن بعض الأشخاص حتى لو ما كملوا معنا، يظل أثرهم فينا جزء من قصتنا مو نهايتها🎬🤍 📌 فيلم إنساني، دافي وموجع.. يستحق المشاهدة.