Ei Thinzar Maung

#NUG အမျိုးသားညီညွတ်ရေးအစိုးရအနေနဲ့လည်း #KIA ကချင်လွတ်မြောက်ရေးတပ်မတော်နဲ့ အပြည့်အဝ ပူးပေါင်းဆောင်ရွက်ဖို့ အစဉ်တစိုက် ကြိုးစားအားထုတ်နေတယ်လို့ ယာယီသမ္မတပြောကြား ဧပြီ ၂ ၊ ၂၀၂၄ အမျိုးသားညီညွတ်ရေးအစိုးရရဲ့ ၁၃/၂၀၂၄ အစိုးရအဖွဲ့အစည်းအဝေးကို ဒီနေ့မနက် ၁၀ နာရီမှာ ပြုလုပ်ခဲ့ကြပါတယ်။ အစည်းအဝေးကို ယာယီသမ္မတ ဒူဝါလရှီးလ၊ ပြည်ထောင်စုဝန်ကြီးချုပ် မန်းဝင်းခိုင်သန်းတို့ အပါအဝင် ပြည်ထောင်စုဝန်ကြီးတွေ၊ ဒုဝန်ကြီးတွေ တက်ရောက်ခဲ့ကြပါတယ်။ အစည်းအဝေးမှာ ယာယီသမ္မတ ဒူဝါလရှီးလက အဖွင့်မိန့်ခွန်းပြောကြားခဲ့ပြီးနောက် ပြည်ထောင်စု ဝန်ကြီးချုပ်က မိန့်ခွန်း ပြောကြားခဲ့ပါတယ်။ ယာယီသမ္မတ ဒူဝါလရှီးလက “ ကျွန်တော်တို့ဟာ နွေဦးတော်လှန်ရေးတစ်ခုလုံးရဲ့ ကံကြမ္မာနဲ့ ဆက်စပ်ပြီး ဖြစ်တည်နေတဲ့ အစိုးရအဖွဲ့ဖြစ်တယ်ဆိုတာ သတိချပ်ဖို့ လိုပါတယ်။ ပြည်သူလူထုဟာ သူတို့ရဲ့ အသက်အိုးအိမ် စည်းစိမ်နဲ့ အနာဂတ် ကံကြမ္မာကို ကျွန်တော်တို့ဆီ အပ်နှံထားကြ တယ်ဆိုတာကို မမေ့ဖို့လည်း အထူးတိုက်တွန်း လိုပါတယ်။ ကျွန်တော်တို့ရဲ့ စဉ်းစားဆုံးဖြတ် ချက်တွေဟာ ထိရောက်တဲ့ မဟာဗျူဟာ စဉ်းစားချက်တွေဖြစ်ဖို့လိုသလို၊ အခြေအနေနဲ့ အချိန်အခါကို နားလည် သဘောပေါက်ပြီး စဉ်းစားတဲ့ ဆောင်ရွက်မှုတွေလည်း ဖြစ်ဖို့လိုပါတယ်။ နွေဦးတော်လှန်ရေးမှာ အတိတ်က ဒီမိုကရေစီတော်လှန်ရေး၊ ကျောင်းသား တော်လှန်ရေး၊ လူထုတော်လှန်ရေး၊ တိုင်းရင်းသားတော်လှန်ရေး… စတဲ့ အတိတ်က လျှောက်လှမ်းခဲ့တဲ့ တော်လှန်ရေးအသီးသီးရဲ့ နောက်ကွယ်က ကျေးဇူးပြုမှုတွေ ရှိခဲ့လို့သာ နွေဦးတော်လှန်ရေး လှိုင်းဟာ အမြင့်မားဆုံး ဒီရေအထိ ရောက်ရှိခဲ့တယ်လို့ ပြောနိုင်ပါတယ်။ ဒါ့ကြောင့် အချိန်အခါ ကောင်းနဲ့ အခွင့်အခါကောင်းကို အလေးအနက်ထား စဉ်းစားပြီး၊ လူထုအတွက် အကောင်းဆုံးသော တော်လှန်ရေးရလဒ်တွေ ထပ်မံ ဆောင်ကြဉ်းပေးဖို့ အထူး မေတ္တာရပ်ခံလိုပါတယ်။ နောင်လာမယ့် ၂၀၂၅ ခုနှစ်မှာ မျှော်မှန်းနိုင်မယ့် တော်လှန်ရေး ရလဒ်တွေကို အခုအချိန်ကတည်းက ကွင်းဆက်မိမိ စနစ်တကျ တည်ဆောက်ထားဖို့ လိုကြောင်း ပြောချင်ပါတယ်။ ” လို့ ပြောကြားပါတယ်။ ဆက်လက်ပြီးတော့လည်း “အခုဆိုရင် မြန်မာနိုင်ငံမြောက်ပိုင်း ဧရိယာ တစ်ခုလုံးရဲ့ တော်လှန်ရေး တပ်ဦးဖြစ်တဲ့ ကချင်လွတ်မြောက်ရေး တပ်မတော်ရဲ့ ခုခံတော်လှန်စစ်ရေးရလဒ်တွေဟာ အင်မတန် အားရကျေနပ်စရာ ကောင်းတာကိုလည်း ထင်ထင်ရှားရှားတွေ့ရပါတယ်။ ကျွန်တော်တို့ အမျိုးသားညီညွတ်ရေးအစိုးရအနေနဲ့လည်း ကချင်လွတ်မြောက်ရေးတပ်မတော်နဲ့ အပြည့်အဝ ပူးပေါင်းဆောင်ရွက်ဖို့ အစဉ်တစိုက် ကြိုးစားအားထုတ်နေပါတယ်။ လက်ရှိ တည်ဆဲအခင်း အကျင်းမှာ၊ နွေဦးတော်လှန်ရေးနဲ့ တိုင်းရင်းသား လွတ်မြောက်မှု တော်လှန်ရေးတွေဟာ တစ်သား တည်း ပေါင်းစည်းနိုင်ခဲ့တာကို ကျွန်တော်တို့ အားလုံး လက်ကမ်းကြိုဆိုကြောင်း ပြောကြားချင် ပါတယ်။ ပြည်သူလူထုကြီးတစ်ရပ်လုံးရဲ့ အခြေအနေကို ပြည်ပြည့်ဝဝ နားလည်သဘောပေါက် ကြဖို့ အရေးကြီးကြောင်း ပြောကြား ချင်ပါတယ်။ ပြည်တွင်းက ပြည်သူလူထုနဲ့ နယ်စပ်ဒေသက ပြည်သူလူထုတွေရဲ့ ဝန်ထုပ်ဝန်ပိုးတွေက မတူညီကြပါဘူး။ အလားတူပဲ၊ မြို့ပြမှာ နေထိုင်တဲ့ ပြည်သူလူထုနဲ့ ကျေးလက်ဒေသမှာ နေထိုင်တဲ့ ပြည်သူလူထုရဲ့ ဝန်ထုပ်ဝန်ပိုးတွေကလည်း မတူညီကြပါဘူး။ ဘယ်လိုပဲ မတူညီသည် ဖြစ်စေ / ပြည်သူလူထုအားလုံးမှာတော့ ဝန်ထုပ်ဝန်ပိုးကိုယ်စီ ရှိနေကြတယ်ဆိုတာကို အလေးအနက်ထား သိမြင်ဖို့ လိုပါတယ်။ ” လို့ ယာယီသမ္မတ ဒူဝါလရှီးလက ပြောပါတယ်။ ဒါအပြင် မဟာဗျူဟာ စဉ်းစားချက်တွေဟာ လူထုရဲ့ ဘေးဒုက္ခတွေကို လျော့ပါး သက်သာ စေဖို့ အဓိက စဉ်းစားရမှာ ဖြစ်သလို၊ လူထုကို အမြဲတမ်း ဒုက္ခပေးနေတဲ့ စစ်အာဏာရှင်စနစ် အမြစ်ပြတ် ချုပ်ငြိမ်းဖို့အတွက်လည်း အဓိကထား စဉ်းစားရမှာ ဖြစ်ကြောင်း၊ အားလုံး ပြည်သူလူ ထုနဲ့ အတူတော်လှန်ရေးအောင်ပွဲတွေဆီ ဆက်လက်ချီတက်နိုင်ကြဖို့ အထူးမျှော်လင့်ကြောင်းလည်း ယာယီသမ္မတက ထည့်သွင်းပြောကြားခဲ့ပါတယ်။ ပြည်ထောင်စုဝန်ကြီးချုပ် မန်းဝင်းခိုင်သန်းက “ပြီးခဲ့တဲ့ မတ်လ ၃၀ ရက်နေ့က ကျွန်တော်တို့ အစိုးရအနေနဲ့ “အကြမ်းဖက်စစ်အုပ်စု၏ အဓမ္မစစ်သားစုဆောင်းမှုလုပ်ရပ်နှင့် ပတ်သက်၍ တိုင်ကြား၊ စုံစမ်း၊ အကြံဥာဏ်ရယူနိုင်သည့် ပြည်သူ့ရေးရာဝန်ဆောင်မှု စတင်ကြောင်း” ကြေညာ ချက်တစ်ရပ် ထုတ်ပြန်ခဲ့တာ ရှိပါတယ်။ အဓိက ပြည်သူ့ရေးရာဝန်ဆောင်မှု Telegram Channel ဖွင့်လှစ် လုပ်ဆောင်ရတဲ့ အကြောင်းက အကြမ်းဖက်စစ်အုပ်စုရဲ့ အဓမ္မစစ်သားစုဆောင်းမှု လုပ်ရပ်ကြောင့် ထိခိုက်ခံစားကြရသော ပြည်သူလူထု၏ စိတ်သောကများအား သက်သာရာ ရစေရန်နှင့် လိုအပ်သော အကူအညီနှင့် အထောက်အပံ့များကို တတ်နိုင်သမျှ ချိတ်ဆက်ပံ့ပိုး ပေးနိုင်ရန် ရည်ရွယ်ပြီး လုပ်ဆောင်ခဲ့တာ ဖြစ်ပါတယ်။ အားလုံးသိကြတဲ့အတိုင်း ဒီလထဲမှာ နေ့စဥ်လိုလို အတင်းအဓမ္မစစ်သားစု ဆောင်းမှုဖြစ်စဥ်နဲ့ ပါတ်သက်တဲ့ စိတ်မချမ်းမြေ့ဖွယ် သတင်း တွေ ကြားနေရပါတယ်။ ကျွန်တော်တို့ တော်လှန်ရေးအင်အားစုတွေအနေနဲ့ ပြည်သူတွေရဲ့ စိတ်သောကတွေဟာ ကျွန်တော်တို့အားလုံးရဲ့ စိတ်သောက ဖြစ်တယ်လို့ ခံယူပြီး အားလုံးညှိနှိုင်း ဆောင်ရွက်လျက်ရှိပါတယ်။ ပြည်သူတွေအနေနဲ့ သိရှိလိုသည်များကို မေးမြန်းနိုင်သလို အကြံ ဥာဏ်တွေ လည်း တောင်းခံနိုင်ပါတယ်။ ကျွန်တော်တို့အနေနဲ့ သက်ဆိုင်ရာ ဝန်ကြီးဌာနအသီးသီး၊ မဟာမိတ် အင်အားစုအသီးသီးတို့နဲ့ ချိတ်ဆက်လုပ်ဆောင်နိုင်သမျှတွေကို ပြန်လည်ဖြေကြား ပေးသွားမှာ ဖြစ်သလို တိုင်ကြားသတင်းပေးလာမှုတွေကိုလည်း မှတ်တမ်းတင်ပြီး သက်ဆိုင်ရာ အဖွဲ့အစည်းတွေကို ပေးပို့ခြင်းတွေ ဆက်လက် လုပ်ဆောင်ပေးသွားမှာ ဖြစ်ပါတယ်။ ” လို့ ပြောကြားပါတယ်။ ဆက်လက်ပြီးတော့လည်း “သက်ဆိုင်ရာ ဌာနအသီးသီးက တာဝန်ရှိသူတွေအနေနဲ့လည်း ဒီကိစ္စ ရပ်ဟာ ကျွန်တော် တို့သွားနေတဲ့ တော်လှန်ရေးလမ်းကြောင်းပေါ်ကို ရောက်လာတဲ့ အရေးပေါ်ကိစ္စ တစ်ခု ဖြစ်နေတာကြောင့် တော်လှန်ရေးတစ်စုံလုံးစာ မဟာဗျူဟာနဲ့ ချိတ်ဆက်ပြီး စနစ်တကျ တုန့်ပြန်စီမံကြရမယ့် ကိစ္စတစ်ခုဖြစ်နေတဲ့အတွက် အာရုံစိုက်ပေးကြဖို့မှာကြားလိုပါတယ်။ အရေး ကြီးတာကတော့ စစ်အုပ်စုအနေနဲ့ ပြည်သူကို တစ်နည်းမဟုတ်တစ်နည်း ဒုက္ခပေးပြီး တိုင်းပြည်ကို အနာဂတ် ပျောက်အောင် အချိန်တိုင်း လုပ်ဆောင်ဖို့ အားထုတ်နေတယ်ဆိုတာကို အမြဲသတိ ချပ် နေကြဖို့ လိုပါတယ်။ ဒါ့ကြောင့် စစ်အုပ်စုသက်ဆိုးရှည်ဖို့ လုပ်ဆောင်လာတဲ့ ဒီအတင်း အဓမ္မ စစ်သားစု ဆောင်းမှုကိစ္စအပါအဝင် ဘယ်လိုကိစ္စမျိုးကိုမဆို ပူးပေါင်းဆောင်ရွက်ခြင်း မပြုလုပ်ကြ ပဲ ကျွန်တော်တို့အချင်းချင်း ချိတ်ဆက်လက်တွဲပြီး နည်းလမ်းပေါင်းစုံဖြင့် ဆန့်ကျင် တော်လှန်သွား ကြရမှာ ဖြစ်ပါတယ်။ ကျွန်တော်အမြဲပြောခဲ့သလိုပဲ ဒီတော်လှန်ရေးဟာ အစကတည်းက လွယ်ကူ ခဲ့တာ တစ်ခုမှ မရှိပါဘူး။ ကျွန်တော်တို့ အားလုံးရဲ့ စစ်အာဏာရှင် အမြစ်ဖြတ် ချေမှုန်းပြီး ဖက်ဒရယ်နိုင်ငံတော်သစ်ဆီ သွားကြမယ်ဆိုတဲ့ ပြင်းပြတဲ့ စိတ်ဆန္ဒ တွေရဲ့ တွန်းအားနဲ့သာ အခက်အခဲ စိန်ခေါ်မှုမှန်သမျှကို ယနေ့အချိန်ထိ တွန်းလှန်နိုင်ခဲ့ကြတာ ဖြစ်ပါတယ်။ အခု ကိစ္စရပ် ဟာဆိုရင် အကြမ်းဖက်စစ်အုပ်စုဟာ တိုင်းပြည်နဲ့ ပြည်သူလူထုကို အဆုံးစွန် စိန်ခေါ်လိုက်တဲ့ လုပ်ရပ်လည်း ဖြစ်နေပါတယ်။ ဒီစိန်ခေါ်မှုကို ကျွန်တော်တို့က အခွင့်အလမ်းအဖြစ် ပြောင်းလဲနိုင်အောင် ကြိုးစားပြီး အတူတကွ ရင်ဆိုင်သွားကြရမှာ ဖြစ်ပါတယ်။” လို့ ပြည်ထောင်စုဝန်ကြီးချုပ်က ပြောကြားခဲ့ပါ တယ်။ အစည်းအဝေးမှာ အမျိုးသားညီညွတ်ရေးအစိုးရရဲ့ တစ်နှစ်တာ အောင်နိုင်ရေး မဟာဗျူဟာ ပြင်ဆင်ရေးဆွဲထားရှိမှုကို ဆွေးနွေးဆုံးဖြတ် အတည်ပြုခဲ့ကြပါတယ်။ အဲဒီနောက် ပြည်ထောင်စု ဝန်ကြီးချုပ်က တင်ပြလာတာတွေကို ပြန် လည်ရှင်းလင်း ဆွေးနွေးပြီး ယာယီသမ္မတက နိဂုံးချုပ်အမှာ စကားပြောကြားကာ အစည်းအဝေးကို ရုပ်သိမ်းခဲ့ပါတယ်။

"စစ်ကိုင်းတိုင်း၊ တမူးခရိုင်၊ တမူးမြို့နယ်၊ ကနန်ကျေးရွာရှိ အရပ်သားပြည်သူများအား အကြမ်းဖက်မြန်မာစစ်တပ်မှ လေကြောင်းဖြင့် ဗုံးကြဲတိုက်ခိုက်မှုဖြစ်စဥ်နှင့် ပတ်သက်သည့် ထုတ်ပြန်ကြေညာချက် " ၂၀၂၄ ခုနှစ်၊ ဇန်နဝါရီလ (၉) ရက် ၂၀၂၄ ခုနှစ်၊ ဇန်နဝါရီလ ၇ ရက် နံနက်ပိုင်းတွင် စစ်ကိုင်းတိုင်း၊ တမူးခရိုင်၊ တမူးမြို့နယ်၊ ကနန်ကျေးရွာ အား အကြမ်းဖက်စစ်တပ်မှ လေကြောင်းတိုက်ခိုက်မှု ကျူးလွန်ခဲ့ပါသည်။ တနင်္ဂနွေ ဘုရားကျောင်းဝတ်ပြုပွဲ ရှိသည့်အချိန်တွင် အရပ်သားပြည်သူများ စည်ကားနေသည့် ရပ်ရွာအပေါ်သို့ ဖျက်အားပြင်းဗုံးများ ကြဲချတိုက်ခိုက်မှုကြောင့် အရပ်သားပြည်သူ အများအပြား ထိခိုက်သေဆုံး ဒဏ်ရာရခဲ့ကြသည်။ အဆိုပါ တိုက်ခိုက်မှုကြောင့် ယခုကြေညာချက်ထုတ်ပြန်သည့်အချိန်အထိ အတည်ပြုထားနိုင်သည်မှာ အသက် ၅ နှစ်မှ ၁၇ နှစ်ကြား ကလေးသူငယ်သေဆုံးသူဦးရေ (၉) ဦး အပါအဝင် စုစုပေါင်းသေဆုံးသူ (၁၇) ဦးနှင့် ဒဏ်ရာရရှိသူစုစုပေါင်း (၁၉) ဦး ရှိသည်ဟု သိရှိထားရပါသည်။ အမျိုးသားညီညွတ်ရေးအစိုးရအနေဖြင့် ယုံကြည်စိတ်ချရသော သတင်းများအပေါ်အခြေခံ၍ ၃၁ ဒီဇင်ဘာ ၂၀၂၃ အထိ ရရှိထားသော အထောက်အထားများနှင့် စာရင်းများအရ မင်းအောင်လှိုင် ဦးဆောင်သော အကြမ်းဖက်စစ်တပ်က မတရားအာဏာသိမ်းယူရန် ကြိုးစားခဲ့သည့်နေ့မှစ၍ ကျူးလွန်လျက်ရှိသော အကြမ်းဖက် သတ်ဖြတ်မှုများကြောင့် အသက် ၁၈ နှစ်အောက်ကလေးသူငယ် (၆၂၇) ဦး၊ အမျိုးသမီး (၁၀၁၇) ဦး သေဆုံးခဲ့ရပြီးဖြစ်သည်။ လေကြောင်းအသုံးပြု၍ အပြစ်မဲ့ပြည်သူများရှိရာ ရပ်ရွာများအား တိုက်ခိုက်မှုပေါင်း (၅၈၃) ကြိမ် ကျူးလွန်ခဲ့ပြီး သေဆုံးသူအရပ်သား (၈၉၇) ဦး၊ ဘာသာရေးအဆောက်အဦးပေါင်း (၇၆) ခုနှင့် စာသင်ကျောင်းပေါင်း (၅၂) ကျောင်း ပျက်စီးဆုံးရှုံးခဲ့ပြီးဖြစ်သည်။ အကြမ်းဖက်စစ်တပ်သည် နိုင်ငံရေး၊ စစ်ရေး၊ သံတမန်ရေးမျက်နှာစာအားလုံးတွင် ပိုမိုရှုံးနိမ့်လာသည်နှင့်အမျှ အရပ်သားပြည်သူများအား လေကြောင်းမှ ဖျက်အားပြင်းဗုံးများအသုံးပြုပြီး ပိုမိုတိုးမြှင့် အကြမ်းဖက်သတ်ဖြတ်လာကြောင်း သက်သေအထောက်အထား အများအပြားရရှိလျက်ရှိပါသည်။ အကြမ်းဖက်စစ်တပ်သည် အာဆီယံအဖွဲ့၏ အချက် (၅) ချက်ပါ ဘုံသဘောတူညီချက် (5 Points Consensus)၊ ကုလသမဂ္ဂလုံခြုံရေးကောင်စီ၏ မြန်မာ့အရေးဆုံးဖြတ်ချက် ၂၆၆၉ (UN Security Council Resolution 2669) စသည်တို့ကို လုံးဝ လေးစားလိုက်နာမှု မရှိသည့်အပြင် ကလေးသူငယ်များကို သတ်ဖြတ်ခြင်း၊ ထိခိုက်ဒဏ်ရာ ရစေခြင်းနှင့် ရပ်ရွာ၊ ဘာသာရေးအဆောက်အဦးများ၊ စာသင်ကျောင်းများကို ပစ်မှတ်ထားတိုက်ခိုက်ခြင်းတို့သည် နိုင်ငံတကာ လူ့အခွင့်အရေးနှင့် လူသားချင်းစာနာမှု ဥပဒေများ၊ စာချုပ်စာတမ်းများ၊ အပြည်ပြည်ဆိုင်ရာနှင့် ဒေသဆိုင်ရာလူ့အခွင့်အရေး သဘောတူစာချုပ်များ၊ ကလေးသူငယ်အခွင့်အရေးဆိုင်ရာ သဘောတူစာချုပ်၊ ဂျနီဗာသဘောတူစာချုပ်၊ ရောမဥပဒေသတို့ကို ချိုးဖောက်နေခြင်းဖြစ်သည်။ ထိုပြစ်မှုများသည် စစ်ရာဇဝတ်မှုနှင့် လူသားမျိုးနွယ်စုအပေါ် ကျူးလွန်သည့် ရာဇဝတ်မှုများ မြောက်နေသည့်အတွက် လုံခြုံရေးကောင်စီအနေဖြင့် နိုင်ငံတကာရာဇဝတ်ခုံရုံးသို့ လွှဲပြောင်းပေးရန် ကုလသမဂ္ဂလူ့အခွင့်အရေးဆိုင်ရာ မဟာမင်းကြီးကိုယ်တိုင် တိုက်တွန်းထားပြီး ဖြစ်သည်။ အဆိုပါကျူးလွန်မှုများတွင်ပါဝင်သော အမိန့်ပေးစေခိုင်းသူ၊ လက်ရောက်ကျူးလွန်သူ၊ အားပေးအားမြှောက် ပြုသူနှင့် တာဝန်ရှိသူအဆင့်ဆင့်ကို အမျိုးသားညီညွတ်ရေးအစိုးရအနေဖြင့် ပြည်တွင်း တရားစီရင်ရေးစနစ်ဖြင့် ဖမ်းဆီးအရေးယူပြစ်ဒဏ်ချနိုင်ရေး အားထုတ်ဆောင်ရွက်သွားမည် ဖြစ်သည်။ ကုလသမဂ္ဂအဖွဲ့ဝင် နိုင်ငံများအနေဖြင့်လည်း ကုလသမဂ္ဂလုံခြုံရေးကောင်စီ၏ မြန်မာ့အရေးဆုံးဖြတ်ချက် ၂၆၆၉ (UN Security Council Resolution 2669) နောက်ဆက်တွဲအဖြစ် အကြမ်းဖက်စစ်တပ်အပေါ် ပိုမိုထိရောက်သည့် စီးပွားရေးပိတ်ဆို့မှုများနှင့် လေယာဥ်ဆီ အပါအဝင် လက်နက်ခဲယမ်း တင်ပို့ရောင်းချခြင်းကို ပိတ်ဆို့မှုတို့ ပါဝင်သော ဆုံးဖြတ်ချက်အသစ်နှင့် ထိရောက်သောအရေးယူဆောင်ရွက်မှုများ ထွက်ပေါ်လာအောင် ဝိုင်းဝန်းလုပ်ဆောင်ပေးရန် လိုအပ်သည်။ ကျူးလွန်မှုများအတွက် အကြမ်းဖက်စစ်တပ် တာဝန်ခံမှုရှိစေမည့် နိုင်ငံတကာ၊ ဒေသဆိုင်ရာနှင့် တစ်နိုင်ငံချင်း တရားစွဲဆို အရေးယူနိုင်ရေး ကြိုးပမ်းမှုများတွင်လည်း ပါဝင်အားထုတ်လုပ်ဆောင်ကြရန် တောင်းဆိုလိုက်သည်။ ပြည်ထောင်စုသမ္မတမြန်မာနိုင်ငံတော် အမျိုးသားညီညွတ်ရေးအစိုးရ

ခမ်းပတ်မြို့အနီး အကြမ်းဖက်စစ်တပ် လေယာဥ်နဲ့ဗုံးကြဲခံရလို့ ကလေးငယ်အပါအဝင် ၁၅ ဦးထက်မနည်းသေဆုံး 😢💔 Today, January 7, 2024, the genocidal military junta in Myanmar perpetrated yet another atrocity, bombing a school in Sagaing, Tamu District of Kanan village near Khampa town. This ruthless act claimed the lives of at least 15 civilians, including children and women. 😢 Regrettably, this adds to the staggering toll of atrocities committed by the genocidal military junta, amounting to at least 170 massacres in the last 35 months. These inhumane acts, including crimes against humanity and war crimes, have resulted in the deaths of thousands of civilians, the destruction of over 90,000 homes (including places of worship, schools, and hospitals), the displacement of more than 2.6 million people, and the desperate need for lifesaving assistance for over 19 million individuals. The international community must not turn a blind eye to these horrific crimes against humanity. Together, we must bring the perpetrators to justice. 🌐💔 #StopMyanmarJuntaAtrocities #JusticeForMyanmar #EndMilitaryJunta -- Source BBC Burmese Breaking - ခမ်းပတ်မြို့အနီး လေယာဥ်နဲ့ဗုံးကြဲခံရလို့ ကလေးငယ်အပါအဝင် ၁၀ ဦးထက်မနည်းသေဆုံး စစ်ကိုင်းတိုင်း၊ တမူးခရိုင်၊ ခမ်းပတ်မြို့အနီးက ကနန်စံပြကျေးရွာထဲကို စစ်ကောင်စီတပ်က လေယာဥ်နဲ့ ဗုံးကြဲခဲ့တာကြောင့် ကလေးငယ်တွေအပါအဝင် သေဆုံးသူ ၁၀ ဦးထက်မနည်းရှိတယ်လို့ သိရပါတယ်။ တမူးမြို့အထွက် တမူး-ခမ်းပတ် ကားလမ်းဘေးက ကနန်ကျေးရွာကို စစ်ကောင်စီတပ်က ဒီနေ့ မနက် ၁၀ နာရီခွဲ ဝန်းကျင်အချိန်မှာ လာရောက်ဗုံးကြဲခဲ့တာလို့ ဒေသခံတွေဆီကနေ ဘီဘီစီက သိရှိရပါတယ်။ ရွာထဲက စာသင်ကျောင်း အနီးမှာ ဗုံးနှစ်လုံး၊ နှစ်ချင်းဘုရားကျောင်းအနီးမှာ ၁ လုံးကျရောက်ပေါက်ကွဲ ခဲ့တာလို့ ချင်းအမျိုးသားကာကွယ်ရေးတပ်ဖွဲ့(အထက်ချင်းတွင်းဒေသ)ကလည်း သတင်းထုတ်ပြန်ပါတယ်။ ထိခိုက်ဒဏ်ရာရသူများပြားပြီး သေဆုံးသူအရေအတွက်လည်း ဒီထက်များနိုင်တဲ့အခြေအနေလို့ သိရပါတယ်။ ဒီဖြစ်စဥ်နဲ့ ပတ်သက်ပြီး နောက်ဆုံးရသတင်းတွေကို ဆက်လက်ဖော်ပြပေးပါမယ်။ ဒီသတင်းအပါအဝင် ဇန်နဝါရီလ ၇ ရက် နောက်ဆုံးရသတင်းများ စုစည်းချက် bbc.com/burmese/articles/c4n… #ဘီဘီစီမြန်မာပိုင်း #မြန်မာ #စစ်တပ် #လေကြောင်းတိုက်ခိုက်မှု #တမူး #ခမ်းပတ်

“ပြည်ပနိုင်ငံများတွင် ရောက်ရှိအလုပ်လုပ်ကိုင်နေသော မြန်မာရွှေ့ပြောင်းအလုပ်သမားများကို အထူးကျေးဇူးတင် မှတ်တမ်းတင်ဂုဏ်ပြုခြင်း” (၂၀၂၃ ခုနှစ်၊ ဒီဇင်ဘာလ ၂၀ ရက်) ၁။ အဖက်ဖက်က မရှုမလှ ရှုံးနိမ့်လျက်ရှိသော အကြမ်းဖက်စစ်ကောင်စီသည် ၎င်းတို့ သက်ဆိုးရှည်စေရေးနှင့် ပြည်သူလူထုကို အကြမ်းဖက်သတ်ဖြတ်ရန် အရေးတကြီးလိုအပ် နေသော နိုင်ငံခြားငွေ ဖြည့်ဆည်းနိုင်ရန်အတွက် ယင်း၏အမည်ခံ အလုပ်သမားဝန်ကြီးဌာန၊ စစ်ကောင်စီဗဟိုဘဏ်၊ စစ်ကောင်စီထောက်တိုင်ဘဏ်များပူးပေါင်း၍ ပြည်ပရောက် ရွှေ့ပြောင်း အလုပ်သမားများ၏ သမ္မာအာဇီဝချွေးနှဲစာအား အတင်းအဓမ္မ ခေါင်းပုံဖြတ်ရယူရန် နည်းလမ်း ပေါင်းစုံဖြင့် ကြိုးပမ်းဆောင်ရွက်လျက်ရှိပါသည်။ ၂။ ထို့အပြင် အကြမ်းဖက်စစ်ကောင်စီသည် ၃၀-၈-၂၀၂၃ ရက်စွဲဖြင့် ညွှန်ကြားစာ တစ်စောင် ထုတ်ပြန်ခဲ့ပြီး ရွှေ့ပြောင်းအလုပ်သမားများ၏ မိသားစုလွှဲပို့ငွေအဖြစ် အခြေခံ လစာ၏ အနည်းဆုံး ၂၅ % ကို လစဉ် သို့မဟုတ် သုံးလလျှင် တစ်ကြိမ် ၎င်းတို့ သတ်မှတ် ထားသော ငွေလွှဲဝန်ဆောင်မှု လုပ်ငန်းများမှတဆင့် လွှဲပို့ကြရန် ပြည်ပအလုပ်အကိုင် အကျိုးဆောင် အေဂျင်စီများကို ဖိအားပေးညွှန်ကြားခဲ့ကြောင်း တွေ့ရှိရသည်။ ၃။ သို့ပါသော်လည်း မြန်မာရွှေ့ပြောင်းအလုပ်သမားများသည် တရားဝင်မှု အလျဉ်းမရှိ သော အကြမ်းဖက်စစ်ကောင်စီ၏ အမိန့်အာဏာဟူသမျှကို တော်လှန်လိုစိတ်ပြင်းပြစွာဖြင့် ဆန့်ကျင်အန်တုခဲ့ကြသည့်အတွက် ယခုအခါ ပြည်ပနိုင်ငံများတွင် ရောက်ရှိအလုပ်လုပ်ကိုင် နေသော မြန်မာရွှေ့ပြောင်းအလုပ်သမားများ၏ မြန်မာနိုင်ငံအတွင်းသို့ ပြန်လည်လွှဲပို့ငွေ များသည် ယခင်ကထက် ၁၀ ပုံ ၁ ပုံခန့်သာ အကြမ်းဖက်စစ်ကောင်စီထံသို့ ရောက်ရှိတော့ ကြောင်း လေ့လာသိရှိရသည်။ ၄။ မြန်မာရွှေ့ပြောင်းအလုပ်သမားများ၏ စိတ်အားထက်သန်စွာ အာဏာဖီဆန်မှုကြောင့် အကြမ်းဖက်စစ်ကောင်စီအတွက် နိုင်ငံခြားငွေရရှိမှု သိသာစွာလျော့နည်းခဲ့ပြီး အကြမ်းဖက် လုပ်ရပ်များ ဆက်လက်ကျူးလွန်နိုင်ရန် အကြပ်အတည်းဆိုက်ရောက်စေခဲ့ပါသည်။ ယခုကဲ့သို့ မြန်မာရွှေ့ပြောင်း အလုပ်သမားများအနေဖြင့် မိမိတို့ ကျရာနိုင်ရာအခန်းကဏ္ဍက အကြမ်းဖက် စစ်ကောင်စီထံ လွှဲပို့ငွေများ မရောက်ရှိစေရန် အချိန်ကိုက်ဆောင်ရွက်ခြင်းသည် ဘဏ္ဍာရေး တိုက်စစ်တွင် တတပ်တအားပါဝင်ခြင်းဖြစ်ပါ၍ မိမိတို့ အမျိုးသားညီညွတ်ရေးအစိုးရအနေဖြင့် နိုင်ငံအသီးသီးသို့ရောက်ရှိနေသော မြန်မာရွှေ့ပြောင်းအလုပ်သမားများအား အထူးကျေးဇူးတင် မှတ်တမ်းတင်ဂုဏ်ပြုအပ်ပါကြောင်း ဖော်ပြအပ်ပါသည်။ ပြည်ထောင်စုသမ္မတမြန်မာနိုင်ငံတော် အမျိုးသားညီညွတ်ရေးအစိုးရ nugmyanmar.org ကြေညာချက်အမှတ် (၁၂/၂၀၂၃)

ဒေါက်တာဆာဆာမှ ကိုဂျင်မီ၊ ကိုဖြိုးဇေယျာသော်၊ ကိုလှမျိုးအောင်နှင့် ကိုအောင်သူရဇော် တို့ကို စစ်ကောင်စီက မတရားသတ်ဖြတ် ကြိုးပေးစီရင်သည့် ပထမနှစ် နှစ်ပတ်လည်နေ့ အောက်မေ့ဂုဏ်ပြု အမှာစကား မြန်မာပြည်သူလူထုက ဖက်ဒရယ် ဒီမိုကရေစီရရှိမှာကို အလွန်ကြောက်ရွံ့တုန်လှုပ်နေသော အကြမ်းဖက်စစ်အာဏာရှင်များသည် ဖက်ဒရယ်ဒီမိုကရေစီအရေးကို ခေါင်းဆောင်သော ကိုဂျင်မီ၊ ကိုဖြိုးဇေယျာသော်နှင့် အပေါင်းအပါတို့ကို ရက်ရက်စက်စက် ကြိုးပေးသတ်ဖြတ်ခဲ့ သည်မှာ ဒီနေ့ (၁)နှစ် ပြည့်သွားပြီဖြစ်သည်။ သူတို့ကို ကြိုးပေးပြီး ရက်ရက်စက်စက် သတ်ဖြတ်ခြင်းဖြင့် မြန်မာပြည်သူလူထုကြီးနှင့် ကိုဂျင်မီ၊ ကိုဖြိုးဇေယျာသော်၊ ကိုလှမျိုးအောင်နှင့် ကိုအောင်သူရဇော်တို့၏ အသွေးအသား၊ ယုံကြည်ခြင်းမှာ ရှိနေသော စစ်အာဏာရှင်အမြစ်ပြတ်ခြေမှုန်းရေးနှင့် ဖက်ဒရယ်ဒီမိုကရေစီ ရရှိရေးကို သွေးအေးစေမည်ဟု အကြမ်းဖက်စစ်အာဏာရှင်များက လူမဆန်စွာ တွေးခေါ်မျှော်လင့်ခဲ့ပါသည်။ သို့သော် သူတို့၏ရက်စက်ကြမ်းကြုတ်သော အကြမ်းဖက် အတွေးအခေါ်ကို ရဲရင့်သတ္တိရှိသော မြန်မာပြည်သူလူထုက ရဲရဲရင့်ရင့် မတုန်မလှုပ် ဆက်လက်တော်လှန်ပြီး သွားနေသည်။ တဖက်မှာ အာဇာနည်သူရဲကောင်းများကို ရက်စက်ကြမ်းကြုတ်စွာ သတ်ဖြတ်ခြင်းသည် မြန်မာပြည်သူလူထုအတွက် ၀မ်းနည်းကြေကွဲစေရန် ရည်ရည်ရွယ်ချက်ရှိရှိ အကြမ်းဖက်စစ်အာဏာရှင်များက မျော်လင့်ခဲ့ပါသည်။ သို့သော် ၎င်းတို့၏ လူမဆန်သော ရည်ရွယ်မျော်လင့်ချက်အားလုံးကို မြန်မာပြည်သူလူထုက ရိုက်ချိုးပြီး ဆန့်ကျင်ဖက်ဖြင့် အာဇာနည်သူရဲကောင်းများ၏ကျဆုံးခြင်းကို ခွန်အားအဖြစ် ယူခဲ့ကြသည်သာမက တော်လှန်ရေးပန်းတိုင်ရောက်သည့်အထိအရောက်သွားမည်ဟု ဂတိသစ္စာဆိုကြခဲ့သည်ကို အကြမ်းဖက်စစ်အာဏာရှင်များက ထပ်မံပြီး အလွန်ကြောက်ရွံ့တုန်လှုပ်လျက်ရှိပါသည်။ မြန်မာနိုင်ငံ စစ်ကျွန်ဘ၀မှ လွတ်လပ်ပြီး ဖက်ဒရယ်ဒီမိုကရေစီရရှိမည်ကို ကြောက်ရွံ့တုန်လှုပ်နေသော အကြမ်းဖက်ခေါင်းဆောင် မင်းအောင်လှိုင်ဦးဆောင်သည့် အကြမ်းဖက်စစ်အာဏာရှင်များသည် ပြည်သူ့အာဏာကို စစ်လက်နက်အားကိုးပြီးသိမ်းယူခဲ့သည့်နေ့မှစ၍ မြန်မာပြည်သူလူထုများ၏ အသွေးအသားနှင့် ယုံကြည်ခြင်းမှာ ရှိနေသော စစ်အာဏာရှင်စနစ်အမြစ်ပြတ်ခြေမှုန်းရေးနှင့် ဖက်ဒရယ်ဒီမိုကရေစီရရှိရေးတို့ကို ရက်စက်ကြမ်းကြုတ်စွာ ဖြိုခွဲရန်နည်းအမျိုးမျိုးဖြင့် ကြိုးစားခဲ့သည်မှာ (၂၈)လ ကျော်ပြီဖြစ်ပါသည်။ လွန်ခဲ့သော (၂၈)လအတွင်း မြန်မာပြည်သူလူထုကို အစုလိုက်အပြုံလိုက် သတ်ဖြတ်ခြင်းအကြိမ်ပေါင်း (၁၄၄)ကြိမ် ကျုးလွန်ခဲ့ပြီး စာသင်ကျောင်း၊ ဘုရားကျောင်း၊ ဘုန်းကြီးကျောင်း၊ ပြည်သူ့ဆေးရုံအပါအ၀င် ပြည်သူလူထုအသက်အိုးအိမ် (၇) သောင်း ကျော်ကိုလည်း ရက်ရက်စက်စက် မီးရှို့ဖျက်စီးခဲ့သည်။ နိုင်ငံတော်သမ္မတ ဦး၀င်းမြင့်၊ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နှင့် ကလေး(၈၀၀)ကျော်အပါအ၀င် အပြစ်မဲ့ပြည်သူ (၂)သောင်း(၄)ထောင် နည်းပါးကို မတရားဖမ်းဆီးချုပ်နှောင်ခဲ့ပြီး (၁၁၅)ဦးကို သေဒဏ်ပေးခဲ့ပါသည်။ (၄၀)ကျော်သည် ထောင်ထဲမှာပင် ရက်ရက်စက်စက် သတ်ဖြတ်ခြင်းခံခဲ့ပြီး (၁၆၀)ကျော်သည် စစ်ကြောရေးတွင် အကြမ်းဖက်စစ်တပ်လက်ထဲမှာ သတ်ဖြတ်ခြင်းခံခဲ့ရပါသည်။ (၅၀)နည်းပါးကို ထောင်ထဲမှ ထုတ်ယူပြီး ယနေ့အထိ သေခြင်း၊ ရှင်ခြင်း မသိရပေ။ လွန်ခဲ့သော (၂၈)လအတွင်း အကြမ်းဖက်စစ်အာဏာရှင်များလက်ထဲမှာ အပြစ်မဲ့ပြည်သူလူထု (၄)ထောင်နည်းပါး အသက်ဆုံးရှုံးခဲ့ပြီး မြန်မာနိုင်ငံ ဖက်ဒရယ်ဒီမိုကရေစီအရေးတွက် အသက်ကို ပေးလှုခဲ့ပြီဖြစ်ပါသည်။ ၎င်းထဲတွင် (၄၀၀)ကျော်သည် ကလေးများဖြစ်ပါသည်။ မတရားအာဏာလုယူခြင်းမတိုင်ခင်မှာ တက္ကသိုလ်၀င်တန်း စာမေးပွဲဖြေဆိုသူ (၁) သန်းနည်းပါးရှိပြီး ဒီနှစ် ၂၀၂၃ တက္ကသိုလ်၀င်တန်းစာမေးပွဲဖြေဆိုသူမှာ (၁)သိန်းကျော်သာရှိနေသည်ကို ကြည့်လျင် အကြမ်းဖက်စစ်အာဏာရှင်များ၏ ရက်စက်ကြမ်းကြုတ်ခြင်းကြောင့် လူငယ် (၉)သိန်းနည်းပါး အထက်တန်းပညာသင်ခွင့် ပျောက်ဆုံးနေပါသည်။ အကြမ်းဖက်စစ်အာဏာရှင်များက မြန်မာနိုင်ငံကလေးများပညာရေးကို ဤကဲ့သို့ အစုလိုက်အပြုံလိုက် ရိုက်ချိုးလိုက်ခြင်းသည် မြန်မာနိုင်ငံ အနာဂတ်ပျောက်ဆုံးသွားအောင် ရည်ရွယ်ချက်ရှိရှိ တိုက်ရိုက် ရိုက်ချိုးနေခြင်းဖြစ်သည်။ မြန်မာနိုင်ငံလူငယ်များ၏ လက်ထဲမှာ မြန်မာနိုင်ငံ၏ ဖက်ဒရယ်ဒီမိုကရေစီ အနာဂတ်ရှိခြင်းနှင့် ဖြစ်ခြင်းကို ရက်ရက်စက်စက် လူမဆန်စွာရိုက်ချိုးနေခြင်းလည်းဖြစ်သည်။ တစ်ချိန်က အာရှတိုက်မှာ အချမ်းသာဆုံးနိုင်ငံသည် အကြမ်းဖက်စစ်အာဏာရှင်များ၏ ရက်စက်ကြမ်းကြုတ်ခြင်းကြောင့် လွန်ခဲ့သော (၂၈)လအတွင်း ပြည်သူ (၁၈)သန်းကျော် အငတ်ဘေးနှင့် ရင်ဆိုင်နေရပြီး (၂)သန်းနည်းပါးသည် အိုးမဲ့အိမ်မဲ့ နေပူမိုးရွာထဲမှာ အကြမ်းဖက်စစ်ဘေးကို ရှောင်နေရသည်။ အကြမ်းဖက်စစ်အာဏာရှင်များ၏ ရက်စက်ကြမ်းကြုတ်ခြင်းကြောင့် ပြည်သူ သန်း(၄၈)ကျော်သည် အလွန်ဆင်းရဲနွမ်းပါးမှုအောက်မှာ တဟုန်ထိုးရောက်ရှိနေပြီး အကြမ်းဖက်စစ်အာဏာရှင်များသည် ၎င်းတို့၏ လူမဆန်သော ဖြတ်(၄)ဖြတ်ကို အသုံးပြုပြီး စစ်လက်နက်သာမက ငတ်မွတ်ခြင်း၊ ခေါင်းပါးခြင်း၊ ဆာလောင်ခြင်း၊ နာကျင်ခြင်းနှင့် ရောဂါများကိုပါ လက်နက်သဖွယ် အသုံးပြုပြီး မြန်မာပြည်သူလူထုကို ဆက်လက် ညှင်းပန်းနှိပ်စက် အကြမ်းဖက်နေပါသည်။ အကြမ်းဖက်စစ်အာဏာရှင်များက ပြည်သူလူထုကို နည်းအမျိုးမျိုးဖြင့် အကြမ်းဖက်နေစေကာမူ ရဲ့ရင့်သတ္တိရှိသော မြန်မာပြည်သူလူထုသည် အကြမ်းဖက်အာဏာရှင်စနစ် အမြစ်မပြတ်မချင်း ဖက်ဒရယ်ဒီမိုကရေစီမရမချင်း အဆုံးထိ ပန်းတိုင်ရောက်သည့်အထိသွားမည်ဟု ဂတိသစ္စာဆိုကြပြီဖြစ်သည်။ ဖက်ဒရယ်ဒီမိုကရေစီမှာ မြန်မာနိုင်ငံ၏ စစ်ကျွန်ဘ၀မှ လွတ်လပ်ရေး၊ တရားမျှတရေး၊ ကိုယ့်ကံကြမ္မာကိုယ်ဖန်တီးရေး၊ ကိုယ်ပိုင်ပြဌာန်းရေးနှင့် တန်းတူညီမျှရေး အားလုံးသည် မြန်မာပြည်သူလူထုကို မနီးမ‌၀ေးမှာ စောင့်ဆိုင်းလျက်ရှိပါသည်။ မြန်မာနိုင်ငံ၏ အနာဂတ်သည် ရက်စက်ကြမ်းကြုတ်သော စစ်အာဏာရှင်စနစ်လုံး၀မရှိသည့် အနာဂတ်ဖြစ်ပြီး မြန်မာပြည်သူများအားလုံးအတွက် လွတ်လပ်ရေး၊ တရားမျှတ‌ရေး၊ လူ့အခွင့်အရေးနှင့် ငြိမ်းချမ်းရေးများကို အပြည့်အ၀ပေးမည့် အနာဂတ်ဖြစ်သည့်အပြင် မြန်မာနိုင်ငံကို အာရှတိုက်မှာ အချမ်းသာဆုံး၊ အ‌ကောင်းဆုံးတစ်နိုင်ငံအဖြစ် ပြန်လည်ရပ်တည်စေမည် သာမက မြန်မာနိုင်ငံကို ကမ္ဘာ့အလယ်မှာ သူ့နေရာအတိုင်း ပြန်လည်ရပ်တည်စေမည့် အနာဂတ်ဆီသို့ ကျွန်တော်တို့ ဆက်လက်ချီတက်နေပြီဖြစ်ပါသည်။ ၎င်းပန်းတိုင်ကို မရောက်မချင်း စည်းလုံးစွာ သွားရမည်။ အလင်းသည် အမှောင်ကို နိုင်သကဲ့သို့ မြန်မာပြည်သူလူထုသည် အကြမ်းဖက်စစ်အာဏာရှင်အမှောင်ထုကြီးကို နိုင်ကိုနိုင်ရမည်။ အကောင်းသည် အဆိုးကို နိုင်သကဲ့သို့ ပြည်သူ့အရေးတော်ပုံကြီးသည် စစ်အာဏာရှင်စနစ်ဆိုးကြီးကို နိုင်ကို နိုင်ရမည်။ ဓမ္မခြင်းသည် အဓမ္မကို အမြစ်ပြတ်ချေမှုန်းနိုင်သကဲ့သို့ အကြမ်းဖက်စစ်အာဏာရှင်စနစ် ကို အားလုံးပါ၀င်သော ဖက်ဒရယ်ဒီမိုကရေစီစနစ်က ချေမှုန်းကို ချေမှုန်းနိုင်ရမည်။ ပြည်သူ့အရေးတော်ပုံအောင်ရမည်။ မြန်မာပြည်ကြီးကို ဘုရားသခင်ကောင်းချီးပေးပါစေ။