فضفضة

🔵 شروط النشر : 1🔴 يكون الموضوع واضح ومباشر. 2🔴 الإبتعاد عن الدراما والتأليف. 3🔴 الإبتعاد عن قضايا السياسة والعنصرية. 4🔴 متابعة الحساب. 5🔴 التأكد من تعديل الأخطاء الإملائية قبل الإرسال. 🟠 نعتذر عن الحذف بعد النشر. 📩 الفضفضه يتم إرسالها لنا عبر صندوق الرسائل الخاصة.

#فضفضه انا طالب ثالث سنة جامعي لكن في التخصص ثاني سنه عمري 21 سنة تنقلت بين اربع جامعات ما بين تقديم جديد وتحويل معدلي من اعلى الطلاب متفوق وسريع في اكتساب المهارات من يوم كنت في ثالث ثانوي ماحصلت طعم السعاده ومشاكل وبعدها دخلت الجامعة ثم انتقلت وانا ما اثق بالاطباء النفسيين فقاعد اواجه كل الامور لوحدي وماحب اشتكي لأحد أبداً طاقتي بدت تستنزف معاد اقدر استمتع بحياتي ومن ناحية دينية الحمد لله ولا فرض يفوتني في المسجد ومؤمن وحافظ من القرآن الشي الكثير.

ننصحكم بحضور هذا اللقاء المتميز لحماية الأبناء

#فضفضه ودي أبدأ أتعلم السواقة رغم ان ماعندي سيارة وامي شوي رافضة الفكرة بحكم خوفها من السواقة وخوفها يصير لي شيء لكني اصريت عليها كيف افتح الموضوع مع ابوي واخليه يوافق عندي خوف من رفضه ومن ناحية اخواني متقبلين الفكرة لكن ابوي احس ممكن يخاف علي ويشوف اني لسى مو مستعدة لهالخطوة وغالباً يشوف ان السواقة تكون بعد ماتوظف شايلة هم كيف افتح معه الموضوع واضمن موافقته وش تنصحوني ؟

#فضفضه انا شاب عمري ١٦ سنة والعلاقة بين ابوي وامي على مدى ٣٠ سنة كانت ممتازة ابوي شخص عصبي شوي بس طيب واذا عصب عليك او على امي ما تمر نص ساعة الا يعتذر وامي كانت اذا عصب عليها ماعندها مشكلة لانه تعرف يعتذر ويتسامحون اخر فترة خواتي ثنتين مراهقات صاروا يحرضونها على ابوي انتي ليش تسكتين وليش يعصب وليش يقولك ليش تاخرتي بالغداء وليش وليش لاتسكتين وحتى ابسط الامور يكبرونها ويقولون لها ردي عليه ومن هالامور وفعلاً بدت تتاثر بكلامهم والي كانت تضحك عليه اول صارت تعصب وماترضاه والان صاروا يتهاوشون بسبب هالافكار وصار طاري الطلاق يتداولونه كثير اتمنى تساعدوني شو اسوي حياتي يمكن تخترب وتكفون لا تسبون حد كلهم اهلي.

#فضفضه زوجي مهاجر وماعندة الامكانية انه يطلعني عندة اللحين وعايشة عند اهل زوجي عندهم قوانين وظلم مايعلم فيه إلا الله الاكل بالقطارة والخزانات حق المويا مقفله بالأقفال وبناتهم ممنوع ينظفو او يطبخو مدلعات كل شي احنى نسوية زوجات اولادهم في ظلم واستبداد كثير بالذات علي وعلى اولادي لانه دايم اتكلم الحق تعب مني عارفة ايش اسوي

#فضفضه تخصصي قانون متخرجة من ٣ سنوات ولا لقيت وظيفه رغم ان معدلي عالي مع مرتبه الشرف الاولى بس ما ابغى ادخل مجال المحاماه اقترحو علي ايش الشهادات اللي ممكن اخذها وتفيدني وشكراً لكم.

#فضفضه تقدم لي واحد فيه سكري نوع اول وجاه فجأه مافيه احد من اهله أو أقاربه فيه سكر نوع اول من الله جاه واصيب فيه بعمر ١٩ سنه وملتزم بأدويته وكل شيء تمام وهو نحيف بس مشكلتة يدخن أحتاج رأيكم.

#فضفضه أبي حل تعبت من أمي ومن التضييق اللي معيشتني فيه عازلتني عن الناس وحارمتني من أبسط حقوقي لين صارت أمنيتي أشوف الشمس وأعيش نفس باقي خلق الله هالوضع سبب لي أمراض نفسية وأثر علي بشكل ما يتصوره أحد وصرت أحاول أهرب منها بالتفكير وأتخيل إني عايشة حياة ثانية غير هالحياة اللي انحرمت فيها من كل شيء لاطلعات مع صديقات ولا اقارب وفوق هالحرمان تطعن بشرفي وتحرض أبوي علي من دون سبب والله العظيم اني ابر فيها ومع لذلك تعاملني بالقسوه هذي عكس اخوي اللي يرفع صوته عليها ويطنشها تحبه وتغليه

# فضفضه اخوي عمره ١٧ لسه مادخل ١٨ قال لأمي انه بيقدم على برنامج خادم الحرمين الشريفين للابتعاث الخارجي وبيختبر آيلتس واتوقع يجلس يدرس برا ٤ سنوات وانصدمت مره من اهلي انهم عادي بيخلونه يروح برا لحاله ومحد حتى بيرافق معه وبخصوص انه لو تعب او شي لاقدر الله احس مره صعب لازم يكون احد معه عالاقل لو بالبدايه لأنه صغير شايله همه الصراحه ومرره خايفه عليه

#فضفضه اذا الخطيب ماعطى رد وقال الله يوفقنا وياكم نهاية الشوفه وش معناته هل هو مو مقتنع، بس دقو من بكره وقالو الولد استخار وتمام اخاف انه متردد.

#فضفضه عندي إيقاف خدمات وأنا موظف براتب شهري 5000 ريال والشركة التي أعمل بها حالياً تعاني من تأخر صرف الرواتب وصلني عرض وظيفي من شركة ملتزمة بمواعيد صرف الرواتب لكن طلبوا مني آيبان بنكي لاستكمال إجراءات التوظيف وأواجه صعوبة في توفيره بسبب إيقاف الخدمات هل توجد طريقة نظامية أستطيع من خلالها فتح حساب بنكي أو استخراج آيبان لاستقبال راتبي رغم إيقاف الخدمات ؟ أتمنى إفادتي من أصحاب الخبرة أو من مروا بنفس التجربة، وجزاكم الله خيرًا.

#فضفضه اخوي انقطع راتبه من تقاعد ابوي الله يرحمه بسبب انه خلص دراسة السؤال اللى انقطع عنه يرجع لبقية العائلة او خلاص ماعاد يرجع ؟

#فضفضه انا ما كنت ابي اتزوج هذي الفتره أبداً بس انخطبت واهلي وصديقاتي كلهم يقولون جربي مو خسرانه شي وكملي وعادي وانا مشيت الموضوع عشان الزن اللي جالس يصير لي وقدر الله وملكنا الى الان مو قادره اتقبل الموضوع أبداً ولا الرجال حاولت قد ماقدر بس كاني جالسه ادور شي يجذبني له غصب وهو مافيه ومشاعري مره متضاربه ودي انفصل بس اخاف اظلمه ويكون من جد الزوج المثالي واخاف اكمل وبرضو اظلمه ب اني اجامل حبي ومشاعري له وما اكون مبسوطه ابد انا للحين مو مبسوطه ومو حاسه بشعور العروسه ومن وقت مانخطبت انطفييت مره اخاف صدق من هذي الخطوه وودي اتكلم مع احد نفس مشاعري هذي ودي افضفض واكمل الموضوع لاحد غريب عني عشان اشوف هل انا دراما ولالا ودعواتكم الله يعطيني ويرضيني يارب

#فضفضه مخطوبة وتبقى على عقد قراني شهر وعرفت قريب انه تم ختاني عند الولادة هل يجب اني اصارح خطيبي قبل عقد القران بهذه المشكلة واذا ماصارحته هل يعتبر هذا غش علماً ان نوع الختان اللي سووه لي يمنعني من اي شعور مع الزوج.

#فضفضه كيف اتغلب على خوف القياده كذا مره اقول ببدأ انزل للشارع العام لكن تجيني نوبة هلع ودوخه وكتمه بشكل مو عادي وما أرتاح لين انزل من السياره احس هالشي يخليني هشه وسط الشارع لدرجة ممكن لو يعترضني أحدبستسلم والله واوقف وش الحل

#فضفضه سبق أن تقدم لي شخص عن طريق الأهل وكنت رافضة الارتباط به لكن بسبب الضغط العائلي وافقت لفترة ثم انتهى الموضوع بالرفض بعد سنوات عاد وأكد أنه لايزال يرغب بالارتباط بي وبعد تفكير واستخارة وافقت لكني غير متأكدة من أن موافقتي نابعة من رغبتي الحقيقية أو من خوفي من ردة فعل أهلي هناك أيضاً أمر شخصي يتعلق بحادث قديم أثر على شكلي ولم أصارحه به حتى الآن ولا أعرف كيف أفتح معه الموضوع أحتاج رأيكم. كيف أعرف أنني أتخذ القرار الصحيح؟ وكيف أخبره بالأمر دون خوف أو إحرا

#فضفضه كيف تقدرون تتعايشون مع شعور إن الشخص اللي آذاكم وظلمكم عايش حياته بشكل طبيعي ومرتاح ومبسوط وكأنه ما ظلم أحد ولا تسبب بأذى أو دمر حياة أحد شعور إنك أنت المتأذي وجالس تعاني إلى الآن بسببه بينما هو مرتاح ومبسوط بحياته شعور مؤلم جدًا أدعي عليه في صلاتي كل يوم وما أبي أشوفه مرتاح ومبسوط بحياته قدامي وأنا للحين أعاني من الأذى اللي تسبب لي فيه ساعدوني كيف أتخلص من هالشعور وأقدر أرتاح وطلبتكم لا تنسوني من دعواتكم الله يأخذ لي حقي منه في الدنيا قبل الآخرة.

#فضفضه وصلت الأربعين كان سابقاً عندي رغبه شديده بالزواج وانا بالعشرين كبرت عانيت معاناة من اليتم لدرجة قلت العمر يمشي لازم أعيش حياتي وبالفعل بديت أعيش حياتي انام ع كيفي واصحى ع كيفي واكل ع كيفي الين الأن فقدت الرغبه بالزواج تماماً صرت اقول معقوله بعد هالراحه يجي احد يتحكم في نومي وقومتي المهم اني فقدت رغبتي التامه في الزواج والله حتى موضوع الأطفال صار يخوفني ادري الموضوع مو طبيعي اني معد أفكر في الزواج بس شلون ارجع رغبتي بالزواج والأطفال احس تقدمت بالعمر معد ابي إلا الراحه اقسم بالله ابي أعوض نفسي عن سنين اليتم والتعب الحمدلله أنا ملتزمه عشان محد يقول تطلعين ع كيفك وتجين ع كيفك شخصيتي ضابطتها ابي ارجع إنسانه طبيعيه واتزوج او يمكن لان اللي تقدموا لي كبار اقول يعني كيف أصوم وأفطر ع بصل أحتاج رأيكم.

#فضفضه انا احب اشرب المناكير مره ومو دايم يجيني حاله احس اني مشتهيه مره اشرب مناكير شخصني شات جي بي تي انه معي pica بس ماعرف وش الحل يعني هل كميات المناكير الصغيره مثلا اربع نقاط كحد اقصى ممكن تسممني على المدى البعيد مره شربت بويه بس طلعت مره قويه حرقت حلقي ياجماعه وفضفضتي محرجه لو ابغا مساعده من اهلي كيف اقولها اذا فيه احد مر بهالحاله ووقف من نفسه يحكي لي عن التجربه ولا تجربون ترا تحرق اللسان واللثه.

#فضفضه عمري ٢٢ ومعي٣٠٠ الف وودي افتح مشروع بالمبلغ ومتوهق وش تنصحوني علماً اتمنى من الله ان يكون الدخل الشهري ٦٠٠٠ الاف (صافي ) وش نصايحكم.