حن قلبي على ذكرى الليال الخوالي
واسرفت فيني دموعي وروحي جريحه
ودي أكتب قصيده ماتفارق خيالي
مير عيت تساعدني عليها القريحه
اعذريني — وانا ماني بداله وسالي
ماقدر اشح يوم انتي ماكنتي شحيحه
انتي اللي فقلبي وانتي اللي فبالي
وانتي اللي عسى تحت ثرى مستريحه
والله وانا احاول كل مامات غالي
استر دموع عيني كنتي أستر فضيحه
لكن بيوم فقدك ماتمالكت حالي
وعيب دمعي عليك أرجعه من مطيحه
انتي اعز من نفسي واعز الغوالي
تستحقين شوقي والمحبه صريحه
كنتي ابلغ جواب أدوره من سؤالي
وكنتي أصدق شعور وكنتي اطيب مديحه
مايعاملني بلطفك احد من عيالي
يكفي ان كل غلطاتي بعينك صحيحه
ماكسرتي بعيد ولا جرحتي موالي
وقلبك العف ماشال النوايا القبيحه
كيف ماهو عطوف ومن ضغاينه خالي
وأنتي تبكي عيونك من الورع صيحه
والله ان لو يحطونه على انسان الي
صار ماهو حديد يحترك بشريحه
كم مره تذوق المر وتقول حالي
قلبها يعذر المخطي قبل يستميحه
ودي انها لهاللحظه تعدل عقالي
وانحني لكفها وحناه واشم ريحه
غير شوقي عقب موتك وش اللي بقالي
لاطرا وجهك الضاحك عسى الله يبيحه
من فقدتك وانا عادي لو افقد ظلالي
واصلاً الارض من فرقاك ماهي فسيحه
غيبتك غيرت كل شي حتى الليالي
لاتهقين الليالي بعد فقدك مليحه
والي على العين لو صديت يطرفني
اقسم لوقع على الثنتين واطرفها
والي يحاول بكثر القول يضعفني
الموج ما يقدر الضلعان يجرفها
والي سهرته وشال النوم من جفني
والله غالي ودوك العين حلفها
كم مهرتٍ حاولت بالعسف تحذفني
ماطولت في ثواني صرت أعسفها
يالكاتب الصعب ما تقدر تألفني
انا رواية صحيحة ما تألفها
مصير الايام تثبتلك وتعرفني
لو ان ماهو مهم النفس تعرفها
—عبدالكريم الجباري .
12
673
وأنتي ياملح الحياة استحليتي اقصاي
وأشقيتي قلبً ببعدك ولاعين الراحه
مايفرق معي الادمي مقفي ولا جاي
وفكري مشغول وعيا لاياخذ استراحه
مابين لعل وياليت ويا مكبر بلواي
وأدور لجرحك دواء ولا طبيب جراحه
وأحسب ليالي البعد واعدها عد حصاي
واطوي على همي وانا مالقيت إفصاحه
كل ما طرى طيفك على البال وذكراي
أحس روحي من عنا الفرقا سواحه
ياكم تمنيت من القمر يختصر لي مسراي
وأشوف وجهٍ غاب عن عيني ومزاحه
ياليت لي قلبٍ على النسيان قواي
لكن قلبي ما عرف غير السماحه
أبقى على عهد الهوى لو طال ممشاي
لين الزمن يكتب لنا وقتٍ وصلاحه .
من أجمل ما قرأت للشاعر حمد السعيد :
ألا يا قلب لا تشره عليه ولمتى غيره
يغيب براحته خله يروح بعالم النسيان
كفاك تدور أعذار لغيابه فضها سيره
تماديت بغلاه ومن تمادى بالغلا خسران
أبد ما فيه بالدنيا بشر يستاهلك غيره ؟
يغيب ولا رجع ما كنك الا العاشق الولهان
انا ما أقول لا ما اقول منت بشايف خيره
وانا ماني بقايل صاحبك وافي ولا خوان
يقولون القمر لا غاب يضويله على ديره
وانا اقول الحبيب ان غاب يضويله على خلان
اجل شأسباب هالغيبه وابي شأسباب تاخيره ؟
وأبي ليه الجفا يا قلب وانت بغيبته حيران
شهر واكثر ولا طرش عن غيابه معاذيره
يا ليته لو تعذر بالظروف ولايمه غلطان
تعبت ولا طرا له يتصل قل علها خيره
وش انت متعب حالك مع واحد قليل احسان
يجي ميت وله لامن شكا وقته وتعزيره
واذا قفا على وجهه حبيبك ناقه عريمان
اقول انه موالف له بشر خلاك تقزيره
وأقول انك على هامش حياته ما بقى لك شان
مع الي ماله سبوق اتركه شف واحد غيره
وانا شوري عليك تلحقه في سبعة الشيطان
ذبحك الطيب يا قلب تعذب من مقاديره
يا عن كنك خفوق ما تعرف النكران
تقضََى لعنبوا جد الغلا ما تنفع الذيرة
ترى من لا تقاضى يا خفوقي هالزمن ينهان
حبيب ما صفا لك طع شوري بدل بغيره
وانا شوري عليك تلحقه بسبعة الشيطان .



















