لاپروائی یا شیخی گروسری اسٹور سے باہر نکلی تو ریلنگ کےساتھ ہی ایک گاڑی کھڑی تھی مطلب وہ گاڑی جانے والی تھی، میرا ڈرائیور اور اسٹور کا ہیلپر سامان گاڑی میں رکھنے کےلئے سامنے پارکنگ میں کھڑی گاڑی کی طرف جا رہے تھے. میں روانہ ہونے والی گاڑی کے قریب سے گزری تو تیز روشنی میں ڈرائیونگ سیٹ پر بارہ تیرہ سال کا ایک معصوم بچہ بیٹھا دکھائی دیا. ساتھ اس کی والدہ اور پچھلی نشست پر آٹھ دس سال کے دو چھوٹے بچے بیٹھےتھے. میں نے اُس کی طرف دیکھتے ذرا سا جھک کر حیرت سے کہا، اتنا چھوٹا بچہ گاڑی چلا رہا ہے؟میری بات سُن کر بچے نے خوشی اور فخر سے میری طرف دیکھا مگر کچھ نہ بولا جبکہ اس کی والدہ سُنی اَن سُنی کرتے ہوئے سامنے دیکھتی رہیں. میں نے سوچا شاید اُس بچے کے والد اسٹور میں گئے ہوں گے اور بچہ ویسے ہی ڈرائیونگ سیٹ پر بیٹھا ہوا ہوگا لیکن اگلے ہی لمحے گاڑی چل پڑی، میں حیرت زدہ دیکھتی رہ گئی کہ والدین اتنے کم عمر بچے کو گاڑی چلانے کی اجازت کیسے دے سکتے ہیں؟ کیا انہیں اپنی اولاد کی جان کی فکر نہیں؟ اس بچے کی اپنی زندگی تو خطرے میں تھی ہی،اس کے ساتھ بیٹھے دوسرے بچوں اور سڑک پر چلنے والے لوگوں کی جانیں بھی خطرے میں ہو سکتی تھیں. بچوں میں گاڑی چلانے کا اشتیاق پیدا کرنا اور انہیں ڈرائیونگ کی اجازت دینا بہت غلط رویہ ہے. . والدین کی ذمہ داری بچوں کی خواہش پوری کرنا نہیں بلکہ انہیں محفوظ رکھنا اور ذمہ داری کا شعور دینا ہے. سب سے زیادہ حیرت اس بات پر ہے کہ وہاں موجود کسی گارڈ اور دیگر نے انہیں روکنے کی کوشش کیوں نہیں کی؟ کیا ہم نے غلط کو غلط کہنا بھی چھوڑ دیا ہے؟ یاد رکھیے، چند لمحوں کی خوشی یا فخر کے لیے اٹھایا گیا ایک غیر ذمہ دارانہ قدم کسی خاندان کی پوری زندگی کا دکھ بن سکتا ہے. یہ بچوں سے محبت نہیں دشمنی کے مترادف ہے، آج آپ خود اُنھیں لاقانونیت کا سبق دے رہے ہیں تو کل وہ کیسے قانون کی پیروی کریں گے…