ሳምሶን

ለ30 አመታት በስራ ላይ የቆየው ሪፖርተር ጋዜጣ ላልተወሰነ ጊዜ ታገደ የኢትዮጵያ መገናኛ ብዙኃን ባለስልጣን በሚዲያ እና ኮሙኒኬሽን ሴንተር ኃ.የተ.የግል ማኅበር የሚታተሙትን ሪፖርተር ጋዜጣ እና የእንግሊዝኛውን ዘ-ሪፖርተር ጋዜጣ አግዷል፡፡ ባለሥልጣኑ የጋዜጣውን የአማርኛ እና እንግሊዝኛ ዕትሞች በተመሳሳይ ጊዜ ያገደው፣ ላልተወሰነ ጊዜ መሆኑን አስታውቋል፡፡ እግዱ ሪፖርተር አማርኛ፣ ዘ-ሪፖርተር እንግሊዝኛ፣ እንዲሁም ኢትዮጵያን ሪፖርተር የዲጂታል ፕላትፎርም ላይ ሙሉ በሙሉ የተጣለ ነው፡፡ ለሚዲያው የተሰጠው የምዝገባ ምስክር ወረቀት መገታገዱ ተከትሎ፣ የአማርኛ እና የእንግሊዝኛ ሪፖርተር ጋዜጦች መታተም አይችሉም ተብሏል፡፡ ሪፖርተር ተቆጣጣሪ ባለሥልጣኑን ጨምሮ ከተለያዩ አካላት በተደጋጋሚ ጫና እያስተናገደ የቆየ ሲሆን፣ በቅርቡም ተደራራቢ የማስጠንቀቂያ ደብዳቤዎች እንደደረሱት ታውቋል፡፡ ባለሥልጣኑ ሚዲያውን ያገደው በይዘቶቹ ላይ ከአንድ ዓመት በላይ አደረኩት ባላቸው የይዘት ክትትል፣ “ተደጋጋሚ የህግና የሙያ ስነ ምግባር ጥሰቶች” ፈጽሟል በሚል ነው፡፡ ለጋዜጣው መታገድ እንደ ምክንያ የቀረቡት ክሶች፣ “በሀገር ፖለቲካዊ፣ ማኅበራዊና ኢኮኖሚያዊ አውድ ላይ ከፍተኛ አሉታዊ ተጽዕኖ ያላቸውን ርዕሰ ጉዳዮች በማንሳት ከሚሰጣቸው አርዕስት ጀምሮ ማጮህ”“ሀገራዊ መረጃዎችን በቁንጽል እይታ ላይ ተመስርቶ በመዘገብ በኅብረተሰቡ ዘንድ ጥርጣሬና ብዥታን መፍጠር”፣ “የውጭ ኢንቨስትመንት፣ ቱሪዝምና ዲፕሎማሲ ላይ አሉታዊ ተጽዕኖ የሚፈጥሩ የተዛቡ መረጃዎችን ማሰራጨት”፣ “የሀገር ገጽታን የሚያጠለሹ፣ የሀገርን ብሄራዊ ደህንነትን የሚጎዱ፣ የህዝቦችን አብሮነትና እሴት የሚሸረሽሩ መረጃዎች ማሰራጨት”፣ “ሚዛናዊነት የጎደለው አድሏዊ ዘገባዎችን ማሰራጨት” እና “ከራስ ጥቅምና የግል ፍላጎት በመነሳት ባልተረጋገጠ መረጃ የተቋማትን ስምና ገጽታ ማጠልሸት” የሚሉት ናቸው፡፡