michael

DKD EN SAAI VAT HANDE: KOS SONDER KOSTE Die departement van korrektiewe dienste en @Saai_org het vandag ’n memorandum van verstandhouding onderteken om die departement se landbouproduksie te optimaliseer. Die memorandum baan die weg vir ’n vennootskap met ’n langtermyndoelwit, naamlik om oplossings te vind vir drie belangrike aspekte: voedselproduksie, rehabilitasie en herintegrasie. Ingevolge die vennootskap sal Saai sonder enige koste vir die departement tegniese raad en ondersteuning aan departementele plase verskaf en sy landboukundigheid aan die departement oordra. Kern tot die ooreenkoms is dat geen geld tussen die partye hande sal ruil nie. Die vennootskap begin as ’n loodsprojek van twaalf maande by ses korrektiewe sentrums in Gauteng, Noordwes en die Vrystaat, naamlik Leeuwkop, Zonderwater, Baviaanspoort, Losperfontein, Groenpunt en Grootvlei. Saai sal elke sentrum se grond, water en infrastruktuur evalueer en ’n ontwikkelingsplan opstel wat die spesifieke sentrums se behoeftes aanspreek. Die resultate, onder meer voedselproduksie, besparings en aantal gevangenes wat opgelei word, sal gemeet word om te bepaal of die model na ander sentrums uitgebrei kan word. Verhoogde landbouproduksie beteken dat minder voedsel vir gevangenes aangekoop hoef te word, wat verdere besparings vir die belastingbetaler teweegbring. Die doel is dat fasiliteite sover moontlik selfonderhoudend moet wees. Die vennootskap bied ook aan lae-risiko gevangenes die geleentheid om praktiese ervaring en vaardighede op te doen en erkende, geakkrediteerde opleiding te ontvang. Daardeur staan hulle ná hul vrylating ’n beter kans om werk te vind. Dit is ook ’n direkte belegging in die veiligheid van die gemeenskappe waarheen gevangenes terugkeer, omdat die risiko van heroortreding daardeur verlaag word. Die visie is dat gevangenes soveel moontlik van hul eie voedsel produseer, beter gerehabiliteer word en ná hul vrylating as ’n wetsgehoorsame burger in gemeenskappe opgeneem word.