ِ

"ربِّ أجعلني أتحسس نِعمك علي بدهشة الذي يرى الشيء للمرة الأولى وأوزعني أن أشكرك عليها شكر المؤمن المحب الشغوف "

ياجار كانك طعتني برقـع الطيـر طيرك وحش وقلوبنـا مستميته لولاي رجلٍ من رجال بهـم خيـر ماصد وأغض النظر مـن بخيتـه ياجار طيرك كل ماعرض عصير مدري علامـه يلتفـت مادعيتـه

انا أحب الوفا حتى ولو كان كايد كل ماصبّ كاسه قلت عدوه دووونه

مرني طيفه مع وقت الهجوع والمشاعر والجوارح هاجده أحسبٍ ماعاد في عيني دموع اثر في عيني دموعٍ واجده - خالد مبارك

حيّ من ذكره يداعب مراهيش الغمام صيرميٍ كل قمه طويله رامها ذخر عودٍ يرتكي لـ المهمّات الجسام كم عمارٍ فكها قبل يحين أعدامها

جديع يوم إنه بغاني بغيته ماطمحوني منه كثر العشاشيق واليوم يوم إنه رماني رميته رميةٍ وضيحي رموه التفافيق - مويضي الدهلاويه

عشقت القمر حيث القمر ينبعث به نور وأخص الليالي البيض تزهاه ويزهنه واحب الهوى لاهب من خايع ممطور وريح النفل حيث النفل طيب الخنه واحب الجماله والجماله عمل مبرور واحب الغناه وعز نفسي عن المنه واحب الصراحه والصراحه بها مسرور حيث الصراحه تقطع الشك والظنه واحب الكريم اللي يفرج عن المعسور اليا من عطى حتى اهله ما دروا عنه احب الرجال العارفه واكره المغرور من اغتر في بعض المظاهر يغرنه سقى الله ليال ماضيه قبل هدم السور نحفر العدود ونشرب الماء من الشنه نشوف البنات اليا اوردن كنهم الحور مهار مشاويلن بالاعياد معتنه على الماء تشوف بيوتهم كنهن القور كثير القبايل تقطن العد بالكنه على البال ذكراها ياليت الليالي تدور يا ليت الليالي ماخذنه يجيبنه تذكرت شيبان لنا يوم حنا بزور يحثوننا على الطيب والفرض والسنه لو عاشوا حياة قاسيه في بحر وبرور عسى الله يعوضهم بما فات بالجنه لو دورٍ مضى من بينهم وين ذاك الدور زمان مضى له ذكريات يحلنه يوم الذهب ما يلبسونه بدون خصور جمال النساء ماهو من السوق يشرنه فقدنا حياة البدو مع شوفة المظهور ولا عاد به بدو ولا الطرش له حنه - سليمان الهويدي ( رحمه الله )

بعض العرب هروجه تزيده قدر وبعض العرب تقدّره .. لين يهرج

يحسب إنّـا نسورٍ لـ الطيور الجياع مادرا انّـا عمى عين العدو لا حرب - عبدالله بن عون

بدع رشيد الزلامي قائلًا : أكتب ويكتب لي وأنا أقول حتى ايش حبرٍ على قرطاس ماهوب كافي والوضع ما هو قابلٍ للمطاريش يا أمير بشرني عساها عوافي سجيت يوم غصون قلبي مواريش واليوم يا فرز الوغى شاب قافي وعروق قلبي يالسديري معاطيش امشي وانا مقفي واعاين خلافي رافقت حجاج الهنود الدراويش وسريت مسرى الذيب رجلي وحافي وطال المسير وصار بالجو تشويش متى على الله يصبح الجوّ صافي شيٍ يخدّش ثومة القلب تخديش وسره يعود الى القلوب النظافي يكفيك لايح كلمتي دون تفتيش وعندك خبر ما قال صقر النصافي ما دام انا قلبي جزوعٍ اليا نيش حسّاس من كلمة سريع العيافي ارضٍ خلا لو مابها لقمة العيش اخير من رزقٍ عليه اختلافي والرمز يكفي الحر والخاتمة ويش اقبل تحياتي وانا شاب قافي رد الأمير محمد الأحمد السديري : يا طير ياللي بالسما تنفض الريش ياللي تهز اطراف ريشك خفافي ياللي نهضت الصبح وقت المغابيش وقت الصباح وكلٍ ابصر وشافي اعطيك سرٍ مخزّنه بالنشانيش وانحر رشيد ولك بداره ملافي رشيد من ربعٍ عداة مداغيش وصّل سلامي للعديم السنافي قل له عرفت اهل القلوب المغاشيش اللي عصوا باللي ثمانه رهافي زين الصباح منقش الخد تنقيش عين العنود اللي ترب الشعافي برقٍ يفوتك لو مزونه مراهيش لا تستخيل امطار سحبٍ مقافي العام قلت ازهم هل الخيل والجيش اهل البيوت موسعين الرفافي ليا غدا فعل المراجل تناويش افعالهم مثل الفنر بالكشافي وقلوبهم للضيف دايم هشاهيش وعدوهم سقوه سمٍّ زعافي دور مع الاجواد ضافي العكاريش وابعد عن اهل الكيد والستر ضافي رزقٍ ورا الانذال جوع وعراميش والشرب منهم يالزلامي عيافي اجزم وشم واعرض وبعّد عن الهيش ما فيه كود الشوك مثل الشلافي فيه العقارب والافاعي محانيش والفعل وسط قلوب الاشرار خافي وليا عصوا مالك بنجد مهاويش شرعٍ وسيفٍ للشريعة لحافي راحت سنين الخيل مع حزّب الجيش وهذي سنينٍ يالزلامي عجافي رشيد اهل خلك ترى عندهم طيش ويفرقون اهل القلوب الولافي

أنا لا بغيت أسج عن صورتك جتني مع الطيف ولا علمك الناس ما جت به - سعد بن جدلان

المواصل فـ المحبه شي اساسي وافتراضي والتجافي لو يضيق خاطري ما قرّب اجلي فيه أمـورٍ ما يجوز العذر فيها والتغاضي لـ وصلنا عندها حطيت قلبي تحت رجلي - عناد الشيباني

عسى لايمي في محبتك يا الرفيق البار ما يلقى من يهل العباير على قبره ترى ودي تتكلم علي ّبـ كلام ًحار ولانها تخونك و انت تنصحني العبره بحاول اكفر عن خطاياي ب الاعذار لون مالها في وسع صدرك مغز ابره ولاعاد تختبرني في محبتك مهما صار ترى اللي يحب انسان مهوب يختبره . .

جينا كما سيلٍ محاديره مع روس الجبال تدجر مرتنا من فعايلنا وتعرس بنتها

شدوا من المقطان والبيت اشلعوه البدو مبدين السراير يا بدر اللي ليا جاء ضيفهم ما شاوروه والعذر له عان الذبيحه فـ القدر شفته يجر خطاه في يمناه اخوه ويقصّر الخطوه مثل من قال أدر ياجر قلبي منه لابو أمه لا أبوه مشروبهم صافي و مشروبي كدر - مطلق بن دعيج

يا بجاد لو مرن علي السواليف ما كلهن يا بجاد لدٍ البالي أهرف هريف الذيب عجل المهاريف وأقنب قنيبه في حجى كل عالي مهيّض الشاعر بديع التواصيف يفتل به القيفان فتل الحبالي يا حيسفي لو ما تفيد التحاسيف على زمانٍ يا ظنيني مضى لي بنيت بيتٍ تنتصيه التضاييف يرفع عموده كل كبشٍ جلالي ملفى مشاكيل العرب والهذاليف هذا جنوبيٍ وهذا شمالي في رايعه خمص البطون المهاديف اعز ما ورد خبير الدلالي غطاني اللي جابهن بـ المعاريف ولا ثمنهن دافعه من حلالي - زويبن بن بطي (رحمه الله)

أنا رفيقي ما سمع اللي حكابه لو جاتنا منه السوالف مضاريع اقرا مفاهيمه واحسب حسابه واشوف مدخال القدم والمطاليع ماني عجول بالزعل في غيابه قدام ما سمع منه ما عطى ولا ابيع لاخير في رفقه بليا حبابه ولا خير في جمعا القلوب المواجيع ورفيقك الغالي تحمل عتابه واحلم عليه إليا دفعته دوافيع شيع ثناه ولا تبين عيابه عاره يعورك يابعيد المراميع وان كان دون مرافقك صك بابه لقه قفاك وخل مشيك مع الريع خله على بعدك يسرح ركابه يقضي سنه والا شهورن وأسابيع وإليا طلبك الصلح يا مرحبا به سهل طريقه لايجي له موانيع واحفظ لسانك عنه واستر جنابه لاتجرحه بين الذياب المجاويع ترى اللسان ملكع يندعابه مثل الحصان اللي يبي له مصاريع واجعل على هرج تقوله رقابه عقل يصرف طايشات المواضيع والصمت في بعض المجالس مهابه يكفيك شر اهل الفمي اللواسيع عن كلمتن يقضب خطاها قضابه يركض عليها مصنع الهرج تصنيع خله يروح ومنك خال جرابه يرجع كما المفلس بسوق المطاميع واحفظ صداقة طيبين القرابة ربعك إليا قلت عليك المشاريع سيف نهار الضيق تقضب نصابه ياقاك من حدب السيوف البواتيع وإليا جفاك الدار مالك ومابه رزقك على اللي طوع الكون تطويع ممشاك في حزم تطارد سرابه أخير من شوف الوجيه المدانيع خطو الرخوم مصاحبين الخيابه تجار هرج وباللوازم كراسيع الرجل مثل الذيب رزقه نهابه ياخذ مع الدو الخلاوي قراطيع والطيب ضلعن زامياتن هضابه للريح في شامخ ركونه ذعاذيع عسر المراقي يتعب اللي رقابه ما ياكره كود الحرار القواطيع والا الردى جرف هيال ترابه حوله لزهران المقافي مرابيع يرقد به الصحنى ويلقا الذرابه والبوم بين غصون قشعه مواقيع رجل على الناموس بيض ثيابه ورجل يرقعها على المتن ترقيع ورجل يزايم علته من عذابه عيدان ناره للقريب مواليع على الجماعة كل يوم طلابه خماش وجه لا لقي به منافيع ورجل مع الأيام ما ينصخا به عز الرفيق إليا صفعته صوافيع غيث على من جاه يمطر سحابه عشبه على روس النوابي مفاقيع ورجل سوات الليث عطب صوابه من دون حقه سنع الخصم تسنيع طيب وعصمان الشوارب تهابه يرجا وتخشاه الرجال الصعاصيع ومن لا درى بالناس محدن درابه ماله على سجل النشاما تواقيع ومن لا يحوش النعم بأول شبابه في شيبته يحسب حساب الرواضيع وختامها ذكر النبي والصحابه واستغفر اللي ما يضيع ولا يضيع - مفرح الضمني المطيري

بيني وبينك ما تضيع المعاريف لا شك عندي لك رصيدً مجمد