Uğur Adsız

Kəlbəcərli şair Həjar Şamiloğlu Azərbaycanda imza günü keçirtdi. 25 oktyabr tarixində ədəbiyyatsevərlərin tanıdığı və sevdiyi şair Həjar Şamiloğlunun "Heç bilmədik necə sevdik sevəndə" şeir kitabı üçün imza günü keçirilib. İmza günü Bakı Ekspo Mərkəzində keçirilən 12-ci Bakı Beynəlxalq Kitab Sərgisində, "Mücrü" nəşriyyatının stendində baş tutub. Həjar Şamiloğlunun kitab təqdimatına şairin ailə üzvləri, Azərbaycanın Kürd İcmasının, o cümlədən "Ronahi" Kürd Mədəniyyət Mərkəzinin rəhbərliyi və üzvləri, Kürd İcmasının ağsaqqalı və yazıçı Əhməd Həpo, kürd gənclərindən ibarət "Dəst" Təşəbbüs Qrupunun üzvləri, keçmiş "Rojhat" Kürd Gənclər Təşkilatının üzvləri qatılıblar. Yazıçı-publisist Şərif Ağayar, ilahiyyatçı alim Elşən Mustafaoğlu, şair Mürvət Qədimoğlu Həkəri, tədqiqatçı, şair Nofəl Ədalət və şair, jurnalist Faiq Balabəyli də şair Həjar Şamiloğlu üçün əlamətdar olan təqdimat gününə rəng qatıblar. Şair Həjar Şamiloğlu həm azərbaycanca, həm kürdcə yazsa da, bu kitab şairin sadəcə Azərbaycan dilində olan şeirlərindən ibarətdir. Həjar Şamiloğlunun indiyədək müxtəlif dillərdə 25 kitabı nəşr olunub. 128 səhifəlik bu kitaba isə şairin oxucular tərəfindən sevilən, dillər əzbəri olan şeirləri ilə yanaşı, yeni poetik nümunələri də daxil edilib. Kitabın naşiri Müşfiq Xan, texniki redaktoru Xanım Anela, dizayneri Teymur Fərzi, ədəbi məsləhətçisi Rəqsanə Süleyman, redaktoru isə Anar Amindir. Azərbaycanda kürd ailəsində dünyaya gələn Həjar Şamiloğlu doğma yurdu Kəlbəcərin işğal edilməsindən sonra uzun müddət xaricdə yaşamış, kürd diasporunun inkişafı istiqamətində əhəmiyyətli işlər görmüş, 30 ildən artıq müddət ərzində beynəlxalq kürd ictimaiyyətinə Kəlbəcərin işğalı və Qarabağ həqiqətləri haqqında geniş məlumatlar vermişdir. Onun mərhum atası Azərbaycanda yaxşı tanınan tədqiqatçı alim, şair, etnoqraf Şamil Əsgərovdur. – at Azerbaijan

Yazıçı-publisist, Azərbaycanın Kürd İcmasının ağsaqqalı Əhməde Həpo (Əhməd Apiyev) kitab təqdimatından və şair Həjar Şamiloğlunun yaradıcılığından danışdı. 25 oktyabr tarixində Bakı Ekspo Mərkəzində keçirilən 12-ci Bakı Beynəlxalq Kitab Sərgisində, "Mücrü" nəşriyyatının stendində baş tutan kəlbəcərli şair Həjar Şamiloğlunun "Heç bilmədik necə sevdik sevəndə" şeir kitabının imza mərasiminə qatılan el ağsaqqalı, tanınmış yazıçı Əhməde Həpo müəllifin yaradıcılığını qiymətləndirərək, təqdimat barəsində danışdı. Əhməde Həpo: "Kitabların arasında böyümüşəm. Kitabların arasında nəfəs almışam. İndi kitabı o dəmir qurğuyla (smartfonla) oxuyurlar. Mən o kitabı oxumuram. Kitabı oxuyanda onun iyini gərək çəkəsən. Kitabın iyi dağ çiçəkləri... Kürd dilində adı yadımnan çıxdı. Ew gulan bêhnê wê gulê (pirtûkê) dide (O güllər həmin gülün (kitabın) ətrini verir). Bu elə sərgidir ki, elə hesab edin Allahın təşkil etdiyi sərgidir. Onu da demək lazımdır ki, çox şükür ki, 44 günlük müharibə oldu və İlham Əliyevin başçılığı ilə Azərbaycan qələbə çaldı. Bu gün də bu qədər insanlarla sərgiyə yığışıb kitablarla dünyaya öz səsimizi veririk və dünyaya görsənirik. O (müharibə) olmasaydı, 44 günlük müharibədən əvvəl başımızı qaldıra bilməyəcəkdik ki, biz də insanıq. Mən Əhməde Həpo böyük ürəklə təbrik edirəm. Həjarı uşaqlıqdan tanıyıram. Həjar dəhşətli bir şairdir. Həjar dəryadır. Çox şükür ki, bu gün sərgiyə gəldim. Həjara xoşbəxtlik arzulayıram, Azərbaycana da azadlığının daimi olmasını. Azərbaycanın tarixi təzədən yazılır, həmişə yazılsın." Əhməde Həpo 1933-cü ildə Ermənistanın Qəmərli rayonunda anadan olmuşdur. 1937-ci ildə ailəsi ilə birlikdə Ermənistanın sərhəd rayonlarındakı bütün kürdlər kimi Stalin repressiyalarına məruz qalmış və Mərkəzi Asiyaya sürgün edilmişdir. 10 il sürgün həyatından sonra geri qayıdan Əhməde Həpo çox keçmədən 1948-1953-cü illərdə Ermənistandan azərbaycanlıların Azərbaycanın Mərkəzi Aran rayonlarına köçürülməsi ilə ailəsi ilə birlikdə Yevlax rayonuna köçürülür. Ali təhsil almaq üçün Bakıya gələn Əhməde Həpo dövri mətbuatda müntəzəm çıxış etmiş, sonradan Azərbaycan SSR Nazirlər Soveti yanında Mətbuatda Dövlət Sirlərini Mühafizə edən Baş İdarədə çalışmışdır. O, kürd folklorunun toplanması və nəşr edilməsində böyük xidmətlər göstərmişdir. Əhməde Həpo "Yara", "Qanlı göz yaşları", "Evsiz yolçu", "Ömür çiçəkləri" kimi 10 kitab müəllifidir. Onun əsərləri kürd dilində də nəşr olunmuşdur. Əhməde Həpo müstəqillik illərində bir müddət "Ronahi" Kürd Mədəniyyət Mərkəzinin rəhbərlərindən biri olmuşdur. Yazıçı həmçinin tərcümə fəaliyyəti ilə məşğul olmuş və 1990-cı illərdə Mehdi Hüseyn, Mirzə İbrahimov, İlyas Əfəndiyev və digər Azərbaycan yazıçılarının əsərlərini kürd dilinə tərcümə etmişdir. Əhməde Həpo "Azərbaycan Televiziya və Radio Verilişləri" Qapalı Səhmdar Cəmiyyətində kürd dilində efirə gedən "Kürdün səsi" (Dənqe Kurd) radio verilişinin rəhbəri və eyniadlı qəzetin (Dənqe Kurd) baş redaktoru kimi fəaliyyət göstərmişdir. Hazırda Azərbaycanın Kürd İcmasının ağsaqqalıdır. Şair Həjar Şamiloğlu həm azərbaycanca, həm kürdcə yazsa da, bu kitab şairin sadəcə Azərbaycan dilində olan şeirlərindən ibarətdir. Həjar Şamiloğlunun indiyədək müxtəlif dillərdə 25 kitabı nəşr olunub. 128 səhifəlik bu kitaba isə şairin oxucular tərəfindən sevilən, dillər əzbəri olan şeirləri ilə yanaşı, yeni poetik nümunələri də daxil edilib. Kitabın naşiri Müşfiq Xan, texniki redaktoru Xanım Anela, dizayneri Teymur Fərzi, ədəbi məsləhətçisi Rəqsanə Süleyman, redaktoru isə Anar Amindir. Azərbaycanda kürd ailəsində dünyaya gələn Həjar Şamiloğlu doğma yurdu Kəlbəcərin işğal edilməsindən sonra uzun müddət xaricdə yaşamış, kürd diasporunun inkişafı istiqamətində əhəmiyyətli işlər görmüş, 30 ildən artıq müddət ərzində beynəlxalq kürd ictimaiyyətinə Kəlbəcərin işğalı və Qarabağ həqiqətləri haqqında geniş məlumatlar vermişdir. Onun mərhum atası Azərbaycanda yaxşı tanınan tədqiqatçı alim, şair, etnoqraf Şamil Əsgərovdur. – at Azerbaijan