Houssam 🦁

خدام على واحد التحديت جديد لفهّمني ملي الاحزاب بداو كينشرو البرامج الانتخابيه ديالهوم و كثرو علينا شوية من زيادة... في اطار الFact Check غنحطو هاد الوعود تحت المجهر ديال Gemini و غنشوفو واش هي "طلقة"، "ممكنة التحقيق" ولا "معقولة" و كاين احتمال كبير تحقق! عليك لآمان... للي طلقها يبان 😅

بزاف ديال الناس، خصوصا الطلبة واللي يالاه بادين فالضومين ديال التيك، كيسولو أسئلة بحال: شنو أحسن دومين ندخل ليه؟ Frontend ولا Backend ولا Data ولا AI؟ شنو البروجي اللي نخدم عليه؟ شنو الشعبة اللي نتبع؟ واش ندير ماستر ولا نمشي نخدم؟ اشمن ماستر ندير؟ واش نتخصص ولا نبقى Generalist؟ والمشكل هو أن هاد النوع ديال الأسئلة، فالغالب، صعيب شي واحد آخر يجاوبك عليه أحسن منك نتا. النصيحة اللي وليت كنقول مؤخرا هي: سمع للناس، ولكن فالأخير نتا أكثر واحد خاصو يعزل شنو مناسب ليه. حيت ملي كتسول شي واحد على المسار ديالو، كيفما كان ناجح وعندو تجربة، راه كيعطيك الجواب انطلاقا من الحياة ديالو هو: الاختيارات اللي كانت قدامو، السوق فداك الوقت، الناس اللي لقا، البلاد اللي كان فيها، المسؤوليات ديالو، الحوايج اللي كان مزيان فيهم، الصعوبات اللي واجه… وحتى شوية ديال الزهر والتوقيت. يعني واحد يقدر يقول ليك مثلا: "دخل للـAI، فيه المستقبل." وهو عندو أصلا عندو اهتمام بالرياضيات كبير، لقا mentor زوين، دخل للسوق فالوقت المناسب، وخدم فبيئة كتعاون. واحد آخر يقول ليك "ما تضيعش وقتك فالقراية، سير خدم و دير dropout" ولكن هو لقا أول فرصة بسهولة، أو كان عندو network، أو السوق ملي بدا كان مختلف تماما على السوق اللي غادي تدخل ليه نتا. النصيحة ديالو ممكن تكون صحيحة بالنسبة ليه، وما تكونش بالضرورة صحيحة بالنسبة ليك. وهنا كاين واحد الخطأ كنطيحو فيه بزاف: كنشوفو شي واحد ناجح، ومن بعد كنعتابرو أن الاختيارات اللي دار هي الوصفة ديال النجاح ديالو. بينما كننساو آلاف التفاصيل والظروف اللي ساهمات فالنتيجة. هادشي ما كيعنيش ما نسولوش الناس. بالعكس، التجربة والخبرة عندهم قيمة كبيرة. سول بزاف، قرا بزاف، وشوف كيفاش الناس الآخرين كيفكرو وكيفاش خذاو القرارات ديالهم. ولكن بدل ما تسول شنو ندير! حاول تسول علاش نتا اخترتي هاد الطريق؟ شنو ربحت منو؟ شنو خسرت؟ وكون رجع بيك الوقت شنو كنت غادي تبدل؟ خد من كل واحد قطعة من الصورة، ومن بعد ركب الصورة اللي كتوافق نتا: شنو كيعجبك، فين نتا مزيان، شنو باغي من حياتك، شحال مستعد تضحي، وشنو الفرص اللي فعلا موجودة قدامك. وفبزاف ديال المرات، ما غاديش تعرف الجواب غير بالتفكير. خاصك تجرب. دير بروجي صغير، جرب internship، دير يدك فالعجينة، خدم شهرين على شي حاجة… ومن بعد شوف واش فعلا كتعجبك ولا غير كانت باينة زوينة من بعيد. فالاختيارات الكبيرة ديال القراية، الخدمة والحياة، خد النصيحة كـinput للقرار، ماشي القرار بحد ذاتو. كل يؤخذ من كلامه ويرد، وما تاخد حتى تجربة ديال حتى واحد بحال إلا كانت قرآن منزل. حتى الناس اللي كتعتبرهم ناجحين بزاف، عاشو غير حياة وحدة وجربو غير مسار واحد من بين آلاف المسارات الممكنة. سمع للجميع، ولكن فالآخر القرار خاصو يبقى ديالك.