Десет години Донирај компјутер како иницијатива помага насекаде и секому. Било тоа да е компјутер, споделување барања за прибирање средства за лекување, помагање на други иницијативи да добијат видливост, донирање на лица кои собираат такви средства, испраќање семејства на бесплатен одмор, плаќање семестри на студенти од ранлива категорија и друго. Од денес па за во наредната година нам ни треба помош за да продолжиме да постоиме. За овие речиси десет години со волонтери, донатори и компании што застанаа зад нас, успеавме да донесеме компјутери во илјадници домови, над 125 училиштни кабинети, одделенија во државни болници, доброволни пожарникарски друштва, стартап бизниси. Зад секој од нив стои многу работа, но и дете што добило можност да учи, да создава и да оди напред, училиште кое добило опрема за да изведе современа настава, болница која го подобрила квалитетот на услугите, стартап бизнис кој продолжил да постои. Досега некако наоѓав начини да продолжиме. Но, доаѓа момент кога мојата желба и труд веќе не се доволни. За помалку од еден месец истекува периодот за кој ни е покриена киријата за работилницата во Кавадарци. Досега ова го покриваше компанијата каде што сум вработен, Бидат информатика. 10 години ни е спонзор за да не згаснеме и сме вечно благодарни. Сега треба сами некако да ги обезбедуваме основните месечни трошоци. Околу 450 евра месечно (вклучени сите давачки) се потребни за работилницата да остане отворена. Како непрофитна организација, немаме редовни средства за овие трошоци. Затоа бараме компании и поединци што би се обврзале на месечна поддршка, според своите можности. Некој може да покрие една сметка, некој дел од киријата, а повеќе помали придонеси заедно можат да го обезбедат целиот износ. Во оваа работилница старите компјутери добиваат нов живот и се подготвуваат за следното семејство на кое му се потребни. Поддршката за овој простор овозможува таа работа да продолжи. Просторот мора да биде овој, затоа што во него и ние имаме инвестирано за опрема, познат е на сите и не би сакале да го менуваме. Плус има мнооогу разна опрема распоредена во 4 различни простории и не би сакале да мораме да се селиме. Претешко ми е што го пишувам ова но без решение за овие трошоци ќе бидеме принудени да ја затвориме работилницата. По речиси десет години работа, сакам да направам се што можам за да не дојде до тоа. Ако можете да бидете наш месечен поддржувач, пишете ми во порака за да се договориме. Ако не можете финансиски да помогнете, споделувањето на овој повик може да не поврзе со некој што може. Благодарам на сите што бевте и што сте покрај нас. Има уште компјутери што можеме да ги спасиме и семејства до кои треба да стигнеме, училишта да опремиме само доколку ги имаме гореспоменатите услови. Благодарам ❤️ #ДонирајКомпјутер