الحذر ثم الحذر ‼️ في طريقة نصب جديدة طلعت لي في منصة حراج، وودي أحذركم منها عشان محد يطيح في نفس المشكلة. تشوف منتج بحراج معين وتتواصل مع البائع، ويطلب منك تسوي معاملة عن طريق منصة وساطة اسمها (واثق). عشان تضمن حقك وحقه. تدخل الموقع وتشوفه موقع طبيعي ومرتب، والواضح إنهم مسوينه عن طريق الذكاء الاصطناعي، وهذا الشيء ممكن يعطيك انطباع إنه موقع موثوق. طريقة النصب إن الشخص يكون هو البائع وأنت المشتري، ويقنعك إنك تدفع قيمة الجهاز كاملة عن طريق المنصة، وبعد ما تحوّل فلوسك يختفي ويسحب المبلغ كامل، وتتفاجأ إنك انحظرت! طيب، شلون تتأكد من الموضوع وإيش المفروض تسوي؟ - أول شيء، لا تثق في أي منصة وساطة بمجرد إن موقعها مرتب واحترافي. شكل الموقع لحاله ما يثبت إنه موثوق. - إذا الموقع يعرض سجلًا تجاريًا، ادخل على موقع وزارة التجارة واستخدم خدمة الاستعلام عن السجل التجاري، وتأكد من صحة البيانات واسم المنشأة ونشاطها. بس انتبه، وجود سجل تجاري صحيح ما يعني بالضرورة إن الموقع تابع للمنشأة المذكورة. - أول خطوة سويتها بعد ما شكيت بالموضوع، إني بحثت عن السجل التجاري الموجود في الموقع عن طريق خدمة الاستعلام في وزارة التجارة، وتبين لي إن البيانات الموجودة ترجع لمنصة ثانية. - تواصلت مع الشركة اللي بياناتها موجودة في موقع وزارة التجارة، وأفادوني إن المنصة ما تتبع لهم، وإن فيه قضية مرفوعة عليهم لدى الجهات القضائية. - لا تحوّل فلوسك عن طريق أي منصة قبل ما تتأكد من موثوقيتها والجهة اللي تديرها. ولا تعتمد على كلام البائع أو الروابط اللي يرسلها لك، حتى لو أقنعك إن العملية لضمان حقك وحقه.