Dan 🦋

لو اعطيتك فرصه ترجع شي فاتك وندمان انك ما اخذته وضيعت الفرصة عليك وش بيكون ؟

تخوفني الشخصيات الانطوائية يعني اللي دايم بالبيت ومعزولة ولا عندها اصدقاء ولا حتى روتين لنفسها طبعا اقصد الاشخاص اللي انعزلو اجتماعيا بارادتهم يا ترى وش السبب اللي خلاهم يقررون هالشي ؟ او انه خلقة بالبني ادم ؟

جالسه اراقب حساب هنا مدري هو بنت ولا ولد المشكله يتكلم عن كل شي بس مو قادره احدد وش يكون ، لا الصوره تبين ولا الاسم كل شي نكره مافي اثبات انه بنت او ولد

هذي شكوى جات لمعلمة من والدة طالبة عشان قالت لبنتها " تعالي قربي مع المجموعة لا تصيرين شاذة عن المجموعة " تحسونها عادي ولا منجد لازم الشخص يختار كلماته بعناية ؟

ليش احس النباتات من حزب الصباح والشمس احسها تحب الصباح اكثر من الليل ، اعطوني اشياء تحسونها صباحيه بحتة اتحفوني ✨

صباح الخير لكل احلامنا التي ننتظرها تشرق ذات يوم صباح الجمال لأنفسنا التي لازالت صامدة امام كل ظرف وموقف ، صباح التقاؤل لكل ماهو قادم ويحمل لنا كل الحب ،، اسعد الله صباحكم بالخيرات والمسرات ☀️

ماذا تقول لهذا الليل ؟ ببدأ انا: شكرا لأنني الحفيدة المميزة عند جدتي ♥️🥹

في وحده جت لزواج وهي ما تسمع اغاني وطول الوقت تتأفف وتهاوش عليهم وكل اللي عندها ابتلشوا مايدرون وش يقولون لها وكل شوي تنادي وحده من اهل المعرس تقول طفو الاغاني ما ابيها وصار توتر وحساسيات بسببها ولا هم اللي طفو ولا هي اللي سكتت

جمانة التميمي اللي محتواها عن العقار نزلت فيديو بالتيك لنفسها كذا وهي واقفه وحاطه شيلة البنت حرفيا فيها قبووول مليون ومريحة للعين لكن التافهين شادين حيلهم بالتعليقات السلبية والله وبدون مجاملة اشوفها جميلة وفيها قبول سبحان الله كبير 💛 الله يوفقها ويكفيها شر الحاسدين

بنات لو كنت مخططه مع صديقتك تطلعون مع بعض وزوجك رفض قال ما في طلعه اجلسي بالبيت وش تسوون تعتذرين لصديقتك ولا تكملين الاتفاق وتروحين ؟

يوم جمعتنا في بيت جدتي وقهوة جدتي اللي مافي مثلها ابد 💗 والله يسعد مساكم بالخير والسعادة 🤍

بخوركم اليومي وخاصة بخور يوم الجمعة من وين ؟ ابي بخور ما يصقع براسي او قوي عشان في بيتنا في اخوي معه جيوب انفيه اقترحو لي

وحده تحكي تقول : اختي زارت صديقتها نفاس الروح بالروح ويوم جتها طلع اخو البنت قال لاختي انه خلص وقت استقبالها قامت اختي نزلت القهوة والشاي والحلا وعطته كرت به هديه ورجعت لزوجها قال زوجها ليش رجعتي قالت يقولون خلص وقت الاستقبال قال انزلي هاتي كل الاغراض اللي نزلتيها لهم ولا تراك طالق لان هذي مو صديقه اللي ردتك ونزلت وطقت عليهم الباب قالت جيبو الاغراض اللي جبت وهم ويجيبون كل شي حتى الحلا ماكول نصه 😂😭😭

يوم الجمعة اذكرو الله وصلو على النبي ♥️

وش افضل شي تحبون تسوونه ليلة او يوم الجمعة ؟ خلونا تستفيد من بعض ونكتسب عادات حلوه من بعض ✨

عندي قاعدة ثابته : اللي يحب مستحيل مستحيل يكون بخيل !! اللي يحبك راح تكون يده كريمه عشانك احزن على خالتي زوجها ماشاءالله عنده خييير لكن يمسك فلوسه وما يصرفها الا للحاجة الضروريه القصوى طيب ليش ؟ ترا عادي الانسان يستاهل يكافئ نفسه واللي يحبهم وينبسط بفلوسه ويروح لو مره ويسافر بالسنه امنيتها تسافر وهو مو راضي يسفرها كلنا نسافر الا هي احسها تزعل في خاطرها بس ماتعلمنا 🥲

غازي الذيابي منزل ان زوجته بتولد وتجيب نونو جديد طيب شالفايده خليها تقوم بالسلامه بعدين نزل الخبر 😐

الحين الصداع اللي يجي حول العين هذا يعني السبب ضعف في نظري ؟ طيب انا البس نظاره ليش يجيني هذا الصداع ؟

تدرون ان ماء الاثر لا يشرب ولا يدخل الفم مطلقا ولا يصح الوضوء فيه !! الاثر يصب صبة كاملة من هامة الراس على الظهر اثناء الجلوس كجلسه التشهد او على كرسي ،، شفت شخص كاتب كذا بس مدري عادي انا احسب عادي الوضوء ينفع

تقول : مره وحنا نمشي لمقاعدنا جت حرمه وقالت لولدي شيل الشنطة ارفعها انا قلت لا خلي احد ثاني يساعدك هو شايل شنطي وشنطته يعني مو ناقصنا قال ولدي لا يمه عادي هي استحت شوي وقالت تراها خفيفه واقول بقلبي اجل ورا ما رفعتيها انتي !! انا دايم حتى بالبيت ما احب ولدي يشيل شي ثقيل حتى لو فيه مقاضي او اغراض ثقيله اقول له خلي احد يشيلها عنك وعطهم فلوس يعني انا حريصه عليه ما احب اشيله شي ثقيل , وش رايكم ؟ احسها اوفر يعني عادي لو شال طيب وساعد الحرمه 🥲