اگر میں خوشبو ساز ہوتی کبھی سوچتی ہوں، اگر احساسات کو خوشبو میں ڈھالنے کا ہنر آتا تو میں اس کے وجود کی ہر کیفیت کو کسی انمول عطر میں سمو لیتی۔ اس کی آمد میں صبح کی تازگی، گفتگو میں صندل کا ٹھہراؤ اور مسکراہٹ میں موتیے کی لطافت رکھتی۔ اس کی خاموشی کو پہلی بارش کے بعد کی سوندھی مٹی جیسا بناتی، جس میں سکون بھی ہوتا ہے اور ایک ان کہی اداسی بھی۔ اس کی آواز کے لیے کوئی ایسی تاثیر چنتی جو سماعت سے گزر کر دل میں اتر جائے، اور اس کی غیر موجودگی میں وہ تمام چھوٹی چھوٹی باتیں محفوظ کر لیتی جو قربت میں معمولی، مگر فاصلے پر بے حد قیمتی محسوس ہوتی ہیں۔ مگر پھر خیال آتا ہے کہ بعض لوگ کسی عطر کے محتاج نہیں ہوتے۔ ان کی موجودگی خود ایک کیفیت ہوتی ہے، جو لمحوں کو معنی اور یادوں کو زندگی بخش دیتی ہے۔ اگر میں خوشبو ساز ہوتی تو شاید اس کے نام سے ایک عطر ضرور بناتی، مگر اسے کوئی نام نہ دیتی، کیونکہ بعض احساسات لفظوں کی گرفت سے کہیں آگے ہوتے ہیں۔ اور شاید میری محبت کی سب سے گہری حقیقت یہی ہے کہ میں اسے اپنے پاس رکھنے کی خواہش سے زیادہ، اپنے اندر محفوظ رکھنے کی آرزو کرتی ہوں۔ وہ کبھی میرے قریب ہو یا مجھ سے بہت دور، میرے وجود میں اس کا ایک حصہ ہمیشہ زندہ رہے گا۔ کیونکہ کچھ لوگ زندگی میں ملیں یا نہ ملیں، روح میں یوں اتر جاتے ہیں کہ پھر ان کے بچھڑنے سے بھی ان کی موجودگی ختم نہیں ہوتی۔ اور اگر کبھی مجھ سے پوچھا جائے کہ میری زندگی کی سب سے عزیز خوشبو کون سی ہے، تو میں کسی پھول یا عطر کا نام نہیں لوں گی… بس آنکھیں بند کر کے اسے یاد کروں گی، اور خاموشی سے کہوں گی، وہی… جسے میں نے کبھی مکمل طور پر پایا نہیں، مگر جس کی کمی نے مجھے کبھی خود سے خالی نہیں ہونے دیا ۔تحریر: فاطمہ منصور 🌸 #ReflectionsbyFatima