يختنق صدر وفضا و تطيح عبره
مدري شـ علق مصيري في مصيرك
القلم ياخذ من الاهداب / حبره
ليت هـ الغلطه بحق انسان غيرك
لا الفراق بـ حسّي المبحوح نبره
ما لقيت من الكلام اللي يثيرك
يالكبير اللي بـ عيني شاف كبره
دون شرك رحت في خيرك و خيرك
صرت يوم موادعك لـ الناس عبره
من هذآك اليوم قلت الله يجيرك
الصبور اللي ملا الاحباب صبره
انكتم صدره و جا لك يستجيرك
دوك جرح و دوك خيط و دوك الابره
شفني مسلمك الأمر انت و ضميرك
جيت لك ما عاد لي بـ الحال دبره
لن ما يقدر يخيط الجرح / غيرك
سالم حمد
2
36
2,067
ولا ندري عن الأيام تمشي وين
قبل لا أضايقك و الا تضايقني
أظن إن هذي الخيرة لنا الاثنين
بعد ما أنا دعيت الله يوفقني
على شانك خسرت الزين قبل الشين
وهديت اليدين اللي تعانقني
زهدتك واعتزلت الناس والغالين
وصرت أنت الوحيد اللي مرافقني
تكابرتك وغطيتك برمش العين
وتصاغرت السنين اللي تسابقني
وكنت إن رحت عنك أروح مدري وين
كأن الله ل عينك بس /خالقتني
توهمت وحسبت إني أعرفك زين
وعقبك صارت أوهامي تطوقني
منين أبدأك؟ مدري، وانتهيك منين
وأنا هذا الشعور المر يخنقني
بعد كل الكلام اللي (قبل يومين)
كرهت إحساسي اللي فيك علقني
تساومني على نفسي؟ وتضحك لين
ما عادت ضحكتك هذي تشوقني
بتبقى لعبة إخلاصي ليوم الدين
تِشب النار في صدري وتحرقني
وصدقتي / جروحي في رقبتك دين
بـ تدفعها مع الأيام / صدقني
عشان العيش والملح ومداد سنين
وكثر ما كنت أفرحك وتضايقني
أمانة كان لي عندك قدر.. للحين
طلبتك بس.. لا ترجع وفارقني
-سالم حمد
يا بنت يـ إللّي تبيعين الكلام
عينً ما ترجيك .. لا ترجينها
إمنادمات المشاعر : و الغرام
صرفت عنها النظر من حينها
لعيون بنتً .. ليا حل الظلام
يسري غلاها .. على مغلينها
هيفا خواصر و ممشوقة قوام
ما الله عطى قلبها .. من لينها
لا عرّضت ما عليها إلا اللثام
و أرخت هدبها ولدّت عينها
خلت قلوب البشر مثل الحمام
يوم يتطاير .. تحت رجلينها
لو إن هدبها رصاصً في حزام
ما عوّدت .. لين تقضي دينها
و إليا إستدارت مثل ريم العدام
إللي تلفت .. تحك إبطينها
كنها من العام ما ذاقت طعام
من فلسفتها .. و من تكوينها
إن عود الغيم .. قالت لـ الأمام
و إن بانت الشمس قالت وينها ؟
و إن طبت الحفل و عيون الأنام
مواكب يسارها . . و يمينها
تمشي من التيه كن بيض النعام
يحول بين التراب .. و بينها
من البدايه إلى مسك الختام
مافيه زينً . . يضاهي زينها
حتى المليحه مطيرة المنام
اللي .. على أول ربيع سنينها
يازينها .. فـ البيوت وفـ الخيام
و إن وقّفت جنبها ! .. ياشينها
مثل : إنكسار الإناره فـ الرخام
تماوج الحسن .. في خدينها
إختينها .. و أمها .. بدر التمام
و إن جات بين أمها و أختينها
تفرق بخشمً .. محلّيه الزمام
من صنع ربي : و صنع إيدينها
يا عاذلين إخذو من العمر عام
و خلوني آموت بين ( إثنينها )
أول بشر .. قال لـ الدنيا سلام
اللي بـ دينه .. يكمل دينها
" يا رعبوبة " اللي يحتري فـ الزمان الجاي
يشوفك ؟.. بعد ذاك الجفا و القسى لنتي
هذا قلبي المبلي !.. و ذا بالي ( النساي )
جلو .. عند بيبان " المحبه " و زبنتي
أنا بادي أعيش اغترابي .. وانا بـ مرباي
وعادك !.. ملاذ المغترب مثل ما كنتي
خذيني على قد الوله و اصنعي منفاي
إلين .. اتعافا من ( مصابي ) ولاهنتي
آشوفك " ملاذي وانتصاري " على بلواي
و آشوفك ضياء سود المقادير .. لا بنتي
جروحك لو إن ماهي على شفي و مشهاي
ما شفتيني اعامل " جروحك مثل بنتي "
يا كثر العرب .. لكن ماشي على مبداي
مايستاهل التقدير والحب ! .. غير انتي
و لو لدّت وجيه النسا ماني بـ غواي
تشين " الوجيه المخمليه " ولا شنتي
تمادي ياخشف الريم لين الكلام يطول
مساء وصباح النور واخباري اخبارك
عليك الحنين اللي يتجدد لادار الحول
لو اني مغني ماقدر اعزف على اوتارك
جـمالك يتيه عقل ويحرك المشلول
تقول اللّٰه من الناس ميزك واختارك
ياحظ الحظيظ اللي يشوفك ياذاك الزول
،، يـاحظه ، ويابخته .. وياحظ زوارك !
اشوف الحمام اللي ذهلني وانا مذهول
يوقف على شباكك وتاركِ جارك
طبيعي اشوفك شي نادر ذهب او لول
يازين الهبوب .. وكل نسمه من ديارك
تقول الشعور اللي فـ قلبي دبيك خيول
ياليت الصدف تجمعني ف درب مشوارك
لون العقول احيان تبحث عن المعقول
تـراك الوحيد اللي من الناس بختارك
حبيبي انا للحين عايش على المجهول
يضيع العقل لاشاف نور من انوارك
تثير الشكوك وتبعد اكثر من المسئول
لو اني جبرت القلب ماقدر على جبارك
من المستحيل اني اخليك يالمجمول
انا اقرب من يدينك ومن صكة زرارك
عنتر اللي تجفل الفرسان من سطوة ذراعه
يبكي اليا طروّا السمّار عبله بنت مالك
لاتخليني ترا مافي . . أشرّ من القطاعة
لاتخليني ومريني ليا مريت . . . . بالك
تسألين تحبني ؟ مدري جهل ولا لكاعة
أبك أنا اللي شفت حبة خالك وحبيت خالك
راح حبك لين تفنى فانية و تقوم الساعة
ماتعوضني خصال الناس عنك وعن خصالك
أنتي النسوة ونون النسوة و واو الجماعة
أنتي أعجوبة ولا يعجب الجمال إلا جمالك
فـ القلوب الخضر حبك ينتشر مثل الاشاعة
لين كثرتي محبينك و قللتي وصالك
لاوقفتي كنك تقولين قل سمعاً وطاعة
ولا مشيتي كنك تقولين بشر كيف حالك
من يشوفك لاتحدينه على كنز القناعة
والله أنه ماهو بـ قانع قبل يقعد قبالك !
سالبة عقلي كثر ما ضعت ما أدور دليله
الدروب الي تودينيّ لك اسعى لين اجيها
باقي من الليل ساعاتٍ دقايقها ثقيله
كل لحظه تفرح العشّاق فالليل أخطفيها
لو تقيّدنا الظروف الممكنه و المستحيله
مستعدين نتحمل ضيمها و نعيش فيها
أذبحيني بـ أي شكل يجوز لك و أيّة وسيله
و أعتقيني من دموعٍ لا أبتدت كيف أنتهيها ؟
قبل تِحزن وجهك المملوح يا مملوح شيله
أنتي دموعك قبل تنزل على الأرض افتديها
القصيد الي يلامس خاطرك ما فيه حيله
و الحروف الي تمادت فيك يا بخت أبجديها
ضايعٍ من ضحكة المبسم ليا نفح الجديله
ضيعة الي كل ما أنجز له مهمه يبتديها
لدّي عيونك و ارحّب بالمراهيف الصقيله
ليه تهجرني وانا الي مت منها مت فيها
قولي أحبك , ترا أحبك مثل وجهك جميله
حتى لو ما قد نطقتيها بساعدْك , انطقيها
من كثر ما أنتي حديثٍ لـ الليالي كل ليله
الليال الي تسولف فيك ما شاء الله عليها
حبيبي غبت لكن مرّني طيفك . . مع النسناس
يوصّل لي سلام و حبة من فمك مخطوفه
تحت ضوح القمر سامرت طيفك وانكسر لي باس
يا كثر اللي تحت ضوح القمر يشكي من ظروفه
أنا الحاضر مع الذكرى و أنا الغايب عن الجلّاس
و أنا الواضح و أنا اللي حاجته ماهي بـ مكشوفه
هداياك القديمة تْلحق الهوجاس بـ الهوجاس
وله و أستشعرك في كل بيت و كل معزوفه
بكيتك بـ العيون اللي سرق منها الحنين نْعاس
و خلاها رهينة لـ السهر و الليل و طيوفه
بسيطات الدموع إلا دموع القاسي الحساس
حصانٍ قبل ما تنزل دموعه ينمزع جوفه
دموعه من غلاها ما تركها للثرى تنداس
تساقط من شموخ و لا تطيح إلا على كفوفه
أحبك و المحبة سحر يخلي . . قلوب الناس
عصافير عن التغريد و التحليق . . مكتوفه
محبّتك العظيمة ما لها في مهجتي مقياس
أحاضيها محاضى مسلط بن سعود لـ ضيوفه
سقى الله يوم كنت أجيك في ثوب من الاحساس
ضرير كل ما نطحته يدينك . . رجع شوفه
و يشغلني سؤال لا تماديت وحنيت الراس
على صدرك و صدرك فيه من زود الترف نوفه
وش العذر البليغ ؟ اللي يخلي قدّك الميّاس
يشلّ الثقل من فوق و تحت و يضمّ سرجوفه
وكان أبلغ جواب . . تخلّي الأنفاس بـ الأنفاس
تصادم مع بعض و الشمس تحت الليل مكسوفه
عليك الله و أمانه خلّني بين الرجا و الياس
لعل الحظ يجمّل مرة و أشوف . . معروفه
من الظلم يغرق في بحرك الطامي معرّب ساس
و يسبح به ضعيف ما يهمه غير . . مصروفه !
ياضيقة خاطري خلي سبيلي عاد وش تبغين
بدور للسعادة دامني على .. مشارفها
عطيتك كل مايرضي غرورك من دموع العين
و باقي دمعتين غالية ماني .. بذارفها
امقهقرها ورا ستر الجفون و عادني بعدين
بنطحها مقاديرٍ تصادفني و اصادفها
هي الدنيا كذا في طبعها تلعب على الحبلين
ليا قفا سعدها فرجها واليا اقبلت خفها
خلقنا الله من طين وقبل ما أكون تحت الطين
بدرج خطوتي عن زحمه العالم و أخالفها
أنا قررت أعيش العمر كله لو يدوم سنين
أحاضي وردةً من حبها ماودي ( اقطفها )
ياربي جعلني ما آذوق فرقاها اللهم آمين
عيوف لو بعيف العافيه مانيب عايفها
كثر مالله عطاها من حنان ومن قبول و زین
كثر ماهيب تكبر في عيوني من مواقفها
خذتني من محيط الحظ الأقشر والزمان الشين
على اول شبتي لين أغدقتني من عواطفها
على ايديها عرفت ان المحبه في غرام اثنين
علاقة حبهم مافيه غير الصدق ، ينصفها
جعل تسقى بدايات الغلا والحب ذاك الحين
وتسقى قطعه بيوت لقانا في طوارفها
تفرقنا الظروف ونجتمع عقب البطا شفقين
على ادنى فرصة تسنح نحاول ما نطوفها
ترف قلوبنا و آول ملاقانا ، عناق ایدين
تحت شلال ليلن ما يضمه غير معطفها
شوي شوي لين اضيع بين ايدينها الثنتين
وأحس بنشوة والله ما اعرف كيف اوصفها
على الصدر الحنون أنام من شوق ضناني لين
يصحيني صدى صوت تدافق من شفايفها
توصيني تقول الوصل خله في رقبتك دين
ترى الايام ماتترك رداها وانت عارفها
وانا عاهدتها ما أبور فيها دامنا حيين
لها ( وجهي ) لو تبور الولايف في ولايفها
ترى حب يغذية المواصل والجناب الزين
حياة ثانية من ذاق لذتها ، يوالفها
وترى بنت الحصان النادره ماتقبل التهجين
و خيال مايملي عينها ماهوب ( عاسفها )
ما برد عزمي ولا غيّر لهيب الحب لوني
دام لي قلبٍ من عروق الوفا يسقي وريده
ㅤ
والهوى حظ و نصيب ودمعتي عذرى جفوني
وللجفون سلوم و الدمعه تخاف من النقيده
ㅤ
ليه يا من تسرقين الود من نظرة عيووني !
ما حسبتي غيبة اللي لا نوى الغيبه فقيده
وليه لا عزّمت ابنسى مَن على الدنيا نسوني
ما ذكرت الا انتي و جرحٍ مساحاته عديده
ㅤ
ليت عذرك عن وفاك و غلطتك يلغي شجوني
وليت لي قلبٍ بدون احساس واحكامه شديده
ㅤ
كنت أظنّك ما تعيشين العمر لحظه بدوني
واثر ما لـ الظن غير اللوم . . ولحون القصيده
وأذكريني كل ما فاضت عيونك وفقدوني
وكل ما دمعك نشد خدّك وقال شصار بيده !
وأذكريني لا غزا البرد الضلوع و لا لقوني
ولا جبرك الوقت في ممشاه وأطباعك عنيده
وأذكريني كل ما جاتك مع العالم لحوني
عقب ما كنتي من لساني تعرفين الجديده !
وأذكريني كل ما أحتجتي تخونيني وخوني
في غيابي .. كل ذكرى بيننا كانت سعيده
ولا أنا لامن ذكرتك .. ماذكرت إلا طعوني
فـ الزمان اللي تجمعنا به الله لا يعيده
ما ربحت إلا جفاك و ما خسرت إلا جنوني
ولا بعد هذا سوى النسيان و الفرقى الأكيده
سامح الله غلطة أحساسي قبل غلطة عيوني
وسامح الله هاجسي في ما هدا لك من رصيده
لو ظنوني يوم واحد تشعر بخيبة ظنوني
ما يصير الحزن سيّد الصدر وأفراحي عبيده
سامح الله ذنب كل اللي على الضيقه حدوني
لين صرت أواجه الأيام .. في بسمة وحيده
قلبي اللي راح في يدين رعبوبٍ سروق
سارقٍ قلبي ومتربّعٍ داخل حماه
ما بقى في القلب ضخّه ولا فيه معلوق
غير داجت فيه يا الله طالبك النجاه
أشهد إن الحب جبار يجرح في العموق
حب شخصٍ زاد حبه وصادق في غلاه
قلت باصف ماؤيته بـ عذبات الطروق
وأوصفك يا ظبي يا ظبي ياظبي الفلاه
وجهها سبحان من كمّله شوفه يشوق
وجهها مثل القمر لا تجلّى في سماه
ومبسمٍ لو شافها أكبر مكابر ما يفوق
من سببّ ما شاف يمكن بعد يغمى علاه
وعنقها شبرين والثوب جايٍ له طروق
من ردوفٍ تطوي الثوب لِيا قفى وراه
والعيون عيون شيهانه تتّل السبوق
قبل لحظات المحب عينه اليسرى قطاه
والصدر يا الله عفوك وش اللي ما يلوق
كل شيٍ مبدع الخلق سواه وعطاه
ضاقت علي البسيطه عقب ضاق الخناق
احس ما عاد باقي لي ربع .. واصدقا
مثل السماء : يا عيونٍ دمعها ما يراق
من طاح منها لو يدور الزمن ما رقا
الحب ماهوب عيب ان صار فيه اتفاق
العيب لا صار حبي .. خالي من النقا
نجدية الساس .. من بيني وبينك وفاق
لو فيني عيوب واجد في ضميري تقا
ابغى دقايق عشان أستوعب انك دقاق
بعض التفاصيل تخلف هقوة اللي هقا
معنقٍ مايليق بجيده .. الا العناق
لو كان لـ اغلى الجواهر نقطة الملتقى
يوم اني احب غيرك كنت اخاف ، الفراق
ومعك ما اخاف الفراق وبس اخاف اللقا
عاتبت واجد وشفت ان العتب مايطاق
ماعاد في لساني الا .. مرحبا والبقا
ماودي أشتاق زود أنا اعرف الاشتياق
الشوق ، لا زاد عن حده يعود .. شقا
على جيدك تلبّي لك قلاده لولها حجاج
هنا كان الشعر موضع سجوده موضع قلاده
يا شبه الماء وأرق من الندى وأنعم من الديباج
تدللتي على من هام فيك وحبك زياده
لجل ضحكة عيونك جاتك بيوت القصيد أفواج
قصيدٍ يذهل أنصار الأدب ويثير نقّاده
وكالعاده حضورك للحفل والحاضرين سراج
تُمرّين المكان وتخطفين الضوء كالعاده
أنا شاعـر نهاره ما يجـاري نوره الوهّاج
بعث فيه الله آيات البيان آيات لعباده
معي زهد المعّري ما معي صوفيّة الحلاج
وروحٍ فيك ما هي عن كلام الناس نشاده
أذوق من الهوى ما ذاقت الكوفه من الحجاج
وش يعالج لواعج لهفتي والليل وسهاده
وش يصبّرك يا شوق السجين لساعة الإفراج
وقد جمر انتظارك والصبر جمرته وقاده
حدايق قرطبة جدران غرناطة بحر قرطاج
بلاد إنسان حالم ما لقى له حلم في بلاده
يا سمّار المساء ملحه حديث الكاعب المغناج
رهفيات السوالف تاخذ الملهوف لمراده
سوالفكم عن الشعل ومزاينها ووش يحتاج
وأنا شفّي ربيبات الحسن وأخبار ولاده
وش الإنتاج هذا يا هل البل والله الإنتاج
قوامٍ صبّه الله من بنات الريح في غاده
شغف قلبي ضياء لول القلادة في ترايب عاج
هنوفٍ كل موضع في جسدها موضع قلاده
سرى الليل وش غير الحماسه وابو تمام
نديم الورق والحبر والقهوه الساده
بصدري كلام وفي خيالي وصل واوهام
لو اخير منهن دمعة فوق سجاده
انا اكثر بشر تغريه الاحلام والاحلام
يموت الولد من دونها مادرك مراده
ماعاد ادري شلوني من الفقد والالام
قعدت اتجنب سطوة الوقت وعناده
يالايام وش باقي تخبين يالايام ؟
عسى باقي من ديرة الوصل نشاده
مضى عام عقبه عام واليوم ثالث عام
ولازلت بقدام الطواريق وجداده
يا معذبك وانت تهب حتى مع الأنسام
ويا مقساك وانت تغرب الشخص ببلاده
تكلم تحرك سولي شي انا منضام !
غدى السهر مهنه والتملل غدى عاده
احبك بشر ماني بحبك من الاصنام
علامك تضيم انسان تقدر على اسعاده ؟
تشوف الغريب اللي عدالك وطاح وقام
سواله وش اللي ينفعك من توجاده ؟
تحسب القصيد الهام ! والله مهو بإلهام
قصيدي شعور ماعرف وش هي أبعاده
كتبت ومليت الأرض شعر ووله وهيام !
ولاطعت فيك الناس والناس نقاده
مثل من ملى الدنيا لحون وصدى وانغام
لو انه تشتت بين ورده و .. میاده
من الشعر ما خلد بشر واستمر ودام
لولا شعر ابن زيدون وش حجم ولاده
لو اضيع بك من ضاع فيك انت ماينلام
وش اللوم ونفوس المحبين منقاده
ياكم من صحيح يقتله منك السلهام
وياكم من مريض منك والصبر مافاده
لك قلاده ان حبيت صارت عليك حزام
ولي الصبر لو نارك على الكبد وقاده
ياكثر الفتن من غرتك لاسفل الاقدام
وجهاد الفتى نفسه عليك اعظم جهاده
اشوفك وطن وتشوفني رحلة استجمام
واشوفك عمر وسنين ماهي بمنعاده
معي قلب واحد لو تقسمه خمس اقسام
بحبك بكل اقسامه الخمس ( وزياده )



