Ahmed Khalifa

أنا بحب جداً أتكلم في جامعات وأيفنتات مختلفة، وعارف إن معظمهم ميزانيته ضعيفة وعلى القد، وعمري ما كانت دي مشكلة بالنسبالي. بس مشكلتي الحقيقية في طريقة التعامل. بلاقي اللي بيكلمني بيتفرد ويتني، ويحسسني إنه هو اللي هيطلع يقدم الـTalk وأنا مجرد مؤدي عنده. وتلاقي حد بيقولي ابعتلي البطاقة على WhatsApp، وحد تاني عايز الـCV، وجامعات في محافظات تانية عايزيني أسافر وأقعد في فندق على حسابي، مع إن بيكون فيه ميزانية، وبسمع إن فلان اتعرض عليه كذا وفلان اتعرض عليه كذا. أنا مبكرهش في حياتي حاجة قد عدم السلكان وتشغيل الدماغ، خصوصاً لما حد يفتكر إنه بيتعامل مع مغفل. الموضوع بالنسبالي مش فلوس، أنا ممكن أجيلك آخر الدنيا على حسابي، بس ألاقيك مؤسسة محترمة، بتقدر الناس اللي بتدعوها، وعارفين بيعملوا إيه، مش بتوع لف ودوران ولقطة. المفروض إن فيه احترام متبادل، وكل طرف عارف قيمة اللي التاني بيقدمه. الفترة دي وقتي ضيق جداً، ويدوبك بلاقي وقت آخد فيه نفسي، فلو هخصص جزء من وقتي عشان أروح أتكلم في مكان، هيكون مكان بيعرف ينظم، وبيقدر الناس، وفاهم هو جايب المتحدث ليه، ومين الجمهور اللي مهتم يسمعه. غير كدا، مفيش حاجة تستاهل المجهود. وأنا مش ضد الجامعات أو الأيفنتات الصغيرة، بالعكس، ساعات بكون مبسوط بالمشاركة فيها أكتر من مؤتمرات كبيرة. بس مفيش مبرر مبرر لقلة الاحترافية أو عدم احترام الناس.