مُتَيَّم

ياخي فيه تسلسل من 5 خطوات ، مرعب لطريقة هلاك الإنسان وزوال الخير من يده وممكن تشوف ناس عايشينه ويسوونه بدون لا يحسون ، لازم كلنا نعرفه ونتذكره دائمًا : بدأ الله قصة قارون ( آتينه من الكنوز … ) أنعم الله عليه بكل النعم ، لين تطمن واعتاد النعمة فتكبر الخطوة الثانية ذهب له قومه فنصحوه فقال ( إنما أوتيته على علم عندي …) = بفعل يمناي وبجتهادي وأنا اللي سويت وشقيت الخطوة الثالثه يذكرنا الله بأنه ترا ماهو أول شخص ينعم الله عليه ويعطيه ويرزقه أعطى أمم قبله وأهلكهم ، وهو هنا سبحانه يحذرنا من هذه السلسلة اللي تُهلك صاحبها الخطوة الرابعه يوم طلع قارون قدام قومه وهو في كامل زينته وثراءه وعزته قال قومه كما ذكر الله في القران ( يا ليت لنا مثل ما أوتي قارون ، انه لذو حظٍ عظيم ) = تمر علينا ونشوف مشهور والا شخص متنعم بالسناب والا بأي مكان ونتنمى مثل اللي معه حتى لو كان اكتسبها بطريقة غلط الخطوة الخامسة ( فخسفنا به وبداره الأرض …) واختتم الله القصة بأن الناس اللي تمنوا مكانه بالأمس يتعوذون بالله ويحمدونه إنه ما خلاهم مثله عشان لا يهلكون مثله ترا الله ما أنعم عليك بنعمة عشانك أحسن من غيرك ولا بينك وبين الله وساطه اللي عطاك كل النعم قادر ينزعها منك بغمضة عين ، أنت تتقلب في النعم وشخص آخر مثلك انولد في تسع شهور وكافح وقاتل ويشوف هذا الخير اللي أنت فيه حلم بالنسبة له كل خير أنت فيه اليوم ، الله عطاك اياه أولًا وآخرًا ، كافحت ؟ غيرك كافحت وما حصل سعيت ؟ غيرك سعى وما حصل اجتهدت ؟ غيرك اجتهد وما حصل أكرمك الله بنعم عظيمة جدًا ، لا تكفر بها وتنسبها لغيره وتسخر من فاقدها وتشمت بأحوال من لا يمتلكها ، استشعر فضله واشكره وذكر الناس بحمد النعم عشان ما يجعلها عذاب عليك ويحرمك اياها ويخليك عبره للناس اللهم اني أعوذ بك من زوال نعمتك وتحول عافيتك وفجاءة نقمتك وجميع سخطك، وأدم علينا كل نعمة وزد علينا من خزائن كرمك ورحمتك وجميع المسلمين يا رب العالمين