فيه شيء بقوله ويمكن أحذفه بعدين، لكن لازم ينقال. أربع سنوات من عمري، من أول ما أصحى لين يقرب وقت نومي، وأنا ألبس العباية والنقاب، لسبب ما راح أذكره. وربي وحده يعلم وش مريت فيه خلال هالسنوات. وصلت لمرحلة حتى الشاور صار ثقيل علي، وصرت أكره أشوف نفسي بالمراية. ثقتي بنفسي انهدمت، غرفتي صارت فوضى، وحياتي كلها صارت فوضى. كل شيء حولي صار رمادي، حتى أبسط الأشياء اللي كنت أسويها صارت صعبة علي. ومع الوقت، حتى الحركة صارت تتعبني وترفع دقات قلبي، وكأن جسمي فقد قدرته على أبسط مجهود. بسبب صعوبة التنفس والحركة بالنقاب. وبعد كل هذا تجون تقولون فرض؟! تدرون وش يعني إن الإنسان يوصل لمرحلة ينفر فيها من نفسه ومن حياته بسبب النقاب واخفاء الهوية ؟ تدرون وش يعني إن أبسط تفاصيل يومه تصير عبئًا عليه؟ مو كل شيء تشوفونه من بعيد تعرفون أثره على اللي يعيشه. ومو من حق أحد يستهين بمعاناة غيره أو يفرض عليه تفسيره وقناعاته وكأن تجارب الناس ومشاعرهم ما تعني شيئًا. والأدهى إن بعض الناس يتكلمون بأحكام دينية بكل ثقة، من غير ما يفرّقون بين الدين والعادات الاجتماعية، ومن غير ما يراعون أثر كلامهم على حياة الناس. يا جماعة، خافوا الله في النساء! مو كل امرأة ساكتة يعني إنها مقتنعة، ومو كل وحدة ملتزمة بالظاهر يعني إنها تعيش بسلام من الداخل. وبالذات اللي يتصدرون للفتوى والوعظ: الكلمة اللي تقولونها مو بسيطة، وقد يكون لها أثر كبير على حياة إنسان. اتقوا الله في كلامكم، ولا تتعاملون مع معاناة الناس باستخفاف. أنا أتكلم عن تجربة عشتها، وعن أثر ما يعرفه إلا الله، وما أسمح لأحد يختصر معاناتي في نقاش نظري أو يتكلم عن حياتي وكأنه عاشها مكاني. أربع سنوات من عمري ما كانت مجرد قطعة قماش بالنسبة لي؛ كانت تجربة تركت أثرًا نفسيًا وجسديًا ما زلت أتكلم عنه. ومن حقي إن صوتي يوصل، وإن معاناتي تُسمع بدل ما تُدفن تحت أحكام الآخرين. #٢٠٣٠_بلا_نقاب25 #معتقلات_المنازل25