Dr M V Rama Mohan

కూర్చోడం కొత్త సిగరెట్ వ్యసనం లాంటిది. పొద్దున్న లేచి కమోడ్ మీద కూర్చుంటావు, చేతిలో మొబైల్ ఉంటే అది అరగంటో గంటో అవుతుంది, కూర్చుని తింటావు, కూర్చుని కాఫీ తాగుతావు, కార్లో కూర్చుని పనికెళ్తావు, కూర్చుని ల్యాప్టాప్లో పనిచేస్తావు, కూర్చుని ఆలోచిస్తావు, కూర్చుని కబుర్లు చెప్తావు, తగువొస్తే దా కూర్చుని మాట్లాడుకుందాం అంటావు, కూర్చుని సినిమా చూస్తావు, కూర్చుని పుస్తకం చదువుతావు, కూర్చుని పెయింటింగ్ వేస్తావు, గిటార్ వాయిస్తావు, కూర్చుని కూరగాయలు కోస్తావు, కూర్చుని స్కాన్లు చేస్తావు, పేషెంట్లని చూస్తావు, కూర్చుని పిల్లలకి చదువు చెప్తావు….. ఇలా రోజంతా కూర్చునే ఉంటే నీ ఒంట్లో శక్తి ఎప్పటికి కరిగేను, నీ కండలకి బలం ఎలా వచ్చేను? స్వామి వివేకానంద చెప్పినట్లు “లే, లేచి నడువు” శ్రీ శ్రీ చెప్పినట్లు “ తెలుగు వీర లేవరా, దీక్ష బూని సాగరా!” పోనీ పవన్ కళ్యాణ్ చెప్పినట్లు “ లే లే లేలే ఇవ్వాళే లేలే” ఇలా వీళ్ళంతా నడవమనే చెప్తారు లేదా లేచి నిల్చోమని అంటారు. ఇప్పుడు నేనేమంటానంటే నిల్చుని అన్ని పనులు చెయ్యలేం, కొన్ని కూర్చునే చెయ్యాలి. కానీ యాక్టివ్ గా ఉండండి అంటున్నాను. అలసిపోతే కూర్చోవాలి గానీ, అదేపనిగా కూర్చోకూడదు. నేను పుస్తకం చదివేటప్పుడు అటూఇటు నడుస్తాను, పేషెంటు నోట్సు రాసేటప్పుడు నిలబడి రాస్తాను, మా శ్రీమతితో నడకకి వెళ్తూ మాట్లాడతాను ఇలాంటి చిన్న చిన్న వీలైన మార్పులు చేసుకుంటాను. ఇప్పుడు ఇది కూడా నిల్చోనే రాశాను. మరి మీరేం చెయ్యాలో తెలుసుగా…