سمره

في كل مكان

للأسف خبر قتل زوجة على إيد زوجها بقى خبر متكرر بشكل بيقول بوضوح إن فيه مصيبة. لكن طبعا طالما الضحية أنثى فدي مش من أولوليات حد. الدولة مش فاضية. أهم حاجة القيم العيرة.. أنا أركب دقن! قصة آية مثال لوأد النساء في عصرنا الحالي. البنت دي ضحية أطراف كتير جدا، اشترت الوهم وأطاعت، ومسحت ذاتها، وكفنت نفسها بالحيا، حتى يوم فرحها كانت لابسة الكفن اللي بيتم تسويقه إنه رمز العفة والطهارة حتى تم استياقها لنعشها. من ساعة ما شوفت صورها وكلامها وأنا بأفكر يا ترى فيه كام آية؟ كلهم مدفونين بالحيا، وبيحلموا بالجائزة المؤجلة في صورة زوج وأسرة بالمعايير اللي بيتم فرضها عليهم يوميا.. واللي لو تمردوا عليها يبقوا شرا.. وموا.. على رأي سيادة المستشار! إيه نوع الحياة دي؟ ويا ترى اللي ترضخ وتضيع عمرها عشان تكون غافلة على رأيه.. وفي الآخر تكتشف إن مافيش جايزة! بل الحلم المؤجل هو مجرد كابوس.. قتل بالبطئ لآدميتها في أفضل الأحوال. أو بعل مختل، مهووس بخيالات مريضة، أيضا تم زرعها بداخله منذ الصغر عن كيف يكون رجلا، وإن هذه الرجولة الوهمية تكمن في جسد أنثى يمتلكها. فإن صور له خياله مجرد تحدثها مع آخر، فقد هدر دمها! الناس هتستسهل طبعا وتقول عليه مجنون وخلصت على كدة، اللي بعده. لكن فيه كام زيه برضه؟ كام واحد بيتم تشكيلهم في نفس القالب؟ ما الهوس الديني عبارة عن خلل عقلي على فكرة. محدش بينتبه لده إلا بعد وقوع كارثة. واحد يقتل مراته بسبب إنه شافها بتكلم راجل تاني في الحلم، ويطلع يكتبلك كل من عليها فان! كأنه دبح فرخة! وهو عارف إن المجتمع مش هيعيبه في حاجة في الآخر، وصم الجنون مش مشكلة يعني.. إنما وصمة إنه "مش راجل" دي اللي لابد يتجنبها بأي وسيلة. صناعة تلك الوحوش هي مفرخة بتتم تحت أعين الجميع. وكله عامل نفسه مش شايف ولا فاهم. بيتم التعامل معاهم كقضاء وقدر، رغم الأرقام المرعبة اللي المفروض تستنفر علماء النفس والاجتماع. دا لو إحنا عايزين مجتمع صحي وآمن فعلا. لكن دي مش من أولوياتنا خالص. الدولة مشكورة عايزة بس الأخلاء العيرة (الهمزة مقصودة) لأن اللي بيحصل فعلا هو تفريغ المجتمع من قيمه وأخلاقه الحقيقية، وإحلالها بمنظومة الرجل القروي القفل اللي بيقول حاضر ونعم، ويرجع البيت يرن الولية علقة عشان يكسر كبريائها ويحس إنه راجل ساعتها. ولو فطست في أيده، ولا تزعل، فيه منظومة ذكورية كاملة كفيلة تخففلك العقوبة. أهم حاجة تلغي عقلك. مش عايزين حد يبمبك معانا. خليك مغيب وغافل كدة زي لهيطة. الأمور الدنياوية لا تعني لك أي شئ ولا تمثل لك أي قيمة. سيبهالنا دي. انت ركز في أجساد النساء اللي هيدخلوا جهنم، واقفل على حريمك في القفص زي ما احنا قافلين عليك كدة. نرجع لآية اللي الكل خذلها وأهدر حقوقها واقنعها إن ده لمصلحتها.. الأب في تصريحاته بيقول إن زوجها اعتدى عليها مسبقا وحاول يقتلها، لكنه (الأب) سامحه! نعم؟ ليه؟ هي دي عادي؟ معقولة تستأمنه على بنتك بعد محاولة التخلص منها؟ دا انت اكيد مختل انت كمان يا حاج! لكن لأ.. الأب هنا متبرمج على نفس السوفت وير. بنته بقت على "ذمة راجل" ومالهاش إلا بيت زوجها. ما دا الهدف من وجودها أساسا داخل المنظومة دي. المنظومة كلها مختلة! كام أسرة سلمت بناتها بإيديها لجلادينهم؟ دا من كام يوم أخ قتل أخته عشان رفضت ترجع بيت جوزها اللي بيضربها! ما استناش حتى أن الزوج يكمل المهمة. سلخانة شغالة. بالنسبة للقاتل اللي الناس كانت بتستأمنه على أطفالهم عشان يحفظهم القرآن، هل حد منهم ممكن ينتبه يا ترى هو علم أطفالهم إيه؟ أكيد لأ.. أهم حاجة اليافطة! إذا كانت الدولة رجعت الكتاتيب يا عم! هم أدرى بالصالح العام. فاضيين إحنا نعمل اختبارات للأشخاص المؤهلين لدور تربوي؟ طالما حافظ القرآن ولغته العربية سليمة يبقى ما شاء الله تبارك الله. إحنا ليه نشغل نفسنا بالحاجات دي؟ إيه يعني طلع مختل وقتل مراته بعد شهرين عشان طبعا الشيوخ قالوله فيه حاجة اسمها رؤية! وطالما الحلم إتكرر يبقى كدة ثبتت الرؤية! مش هنلاقيهم معاه في القفص دول طبعا. دا هما دول البركة بتاعتنا! تخيل لو كان المتعوس ده مثلا لقى منظومة تانية عمادها العلم والمنطق.. كان لقى اللي ينصحه يسعى للحل الطبي وكانت الثقافة نفسها هتعتبر الضعف الجنسي أمر طبيعي، لا هو عار ولا فضيحة ولا ينتقص من رجولة الشخص شئ. كان شاف مراته كأنسانة، مش ملكية خاصة ومتاع. لكن إحنا مالنا.. دع الخلق للخالق. أتمنى كل آية تفوق، دا الأمل الوحيد. ماحدش ممكن ينقذك من المهلكة دي إلا نفسك وعقلك. Naglaa Elbaz✍️