تبختري غنْج ، ميلي غيّ ، تيهي دلال
أنا غرامي من الأغصان ميّاسها
فديت جيدٍ من الشامات فيه اختيال
والشفة اللي عرفت الخمر من كاسها
و جديلك اللي تفلّينه وألمه ليال
وعيونك اللي تسهرّني من نعاسها
ما نام طرفٍ نصيبه من جمالك خيال
كم نفس لحظة مرورك تحبس أنفاسها
أنت قمر فوق غصن وله معنق غزال
والقاع من تحتك أزيّن منك ما داسها
أخاذة الزين ، ميّادة ، عصّية منال
وأملَح من التحفت الشيلة على راسها
وش هالتواصيف؟ وش هالذوق؟ وش هالجمال؟
كن السماء كاسيه عودك من لباسها
الحلوة اللي تفوقك وين ؟ هذا محال
هي حلوة الين فيك يْتّم مقياسها
كمال لا يمكن تصيبين فوقه كمال
يا سيّدة عرش ذاكرتي وهوجاسها
ما جابتك ليلة ماهي كريمة خصال
الليلة اللي تجيبك حيّ نسناسها
كم لحظة قد مضت واحساسها لا يزال
لامن تذكرتها يرجع لي احساسها
الحُب فعل ودليل الحُب كثر السؤال
والوصل نبض المحبة والعطاء ساسها
نفسي عن الآخرين تفضّل الإنعزال
إلا عن اللي معاه تحصّل إيناسها
وياك روحي تكون بخير في كل حال
بعدك وهن روحي ولقياك لا باسها
قدام هذا الحسن مالي سوى الامتثال
يا عقلي اللي خذتك الظلم نبراسها
بـ تظل تسقيك لين توصّلك للهبال
ما تكتفي لين تذهب عقل نواسها
فتانة العنق ما يزهاك غير الدلال
مثل ما يزهى قلادة عنقك ألماسها
عيونك المعتقل وأنا رهن الاعتقال
وايديك تملك سعادة نفس واتعاسها
ياشوق روحي لروحي عند كل ارتحال
وحديث نفسي لنفسي بين جلاسها
لا يزعلك شي في الدنيا وأنا أخو العيال
لو تزعلين أقلب الدنيا على راسها
≠ سعود بن مهدي
15
610
فضّلك ربي على الخلق يا زاهي الردوع
ما لغيرك يا أتلع الجيد بالبال شهوه
لا يغرك كان سجيت في يوم الربوع
قالطٍ بالبال في كل سجه وسهوه
كن طيفك لا تهادى على خط الرجوع
عقب سدره بالٍ وهم فنجال قهوه
أشتحن لك يا ضيا العين وأظمى لك وأجوع
وبالغلا عندي تحفظ وعفه ورهوه
كاتبٍ لأجلك فرايد وفي عيني دموع
والشعر سمٍ لحالي وأنا أحسبه لهوه
≠ فهد السعد
14
908
وش جاب طاريّه مع وقت المغيب ؟
ياحي ذا الطاري وحي الله نباه
يالعنبا اللي يحسبون الحب عيب
وهـو تناقله الرواه من الرواه
وشلون احب بلا رقيب ولا حسيب
وقلبي لامنه حب يسرف في عطاه
غير الرقيب الذاتي ابغى لي رقيب
خـايف رقيبي لا يـضيّع الاتجـاه
احترت بين القلب والعقل اللبيب
في حب من حيرني بحبه جفاه
احرمني من الوصل والعذر النصيب
واكرمني من الهجر يامال الغناه
عقلي يقول ابعد عن الحب المريب
وقلبي يقول ايحبك وهذا جزاه
تـرا الجفا مايعتبر منه غريب
عوايده دايم يسوي ذا السواه
زعلان والزعلان لويخطي مصيب
حقه مهوب تجفاه حقه في رضاه
الهجر مايرضي حبيبً من حبيب
لكن حبيبك والله ان عذره معاه
انا المجرب فالمحبه والطبيب
عندي شهاده من وفاك ومن وفاه
كـلش يهون الا غيابه لايغيب
وان صمم انه يغيب ياخذني معاه
نعيش وظـنون المحبه مـاتخيب
ويجرح على كيفه عسى جرحي فداه
كل الجروح اتطيب والجرح العطيب
من واحدن غلا جروحه من غلاه
مابي الجروح اللي تجي منه تطيب
ابي جروحه باقيه .. مدى الحياه
≠ جطلي بن فهد
22
1,087
حبيب الفواد إللي جعل فـ الفواد فتوق
من المستحيل جروحه .. تخيّب ظنونه
ماهو لازم يرّجع علي " قلبي المسروق "
بـ آعيش الغرام الموجع .. إللي يقولونه
طعون الزمان علاجها " طعنة الغرنوق "
مثل ما النحل نستخلص الطب بطعونه
أدين لـ جمال أوصافه و شخصه المرموق
بعدهم عرفت إن فرصة العمر : مضمونه
" سيادة سموّه " تشمل العقل و المعلوق
ماغير الكرامه بس ؟.. ماهي بـ مرهونه
من خيانة المحبوب ! .. و خيانة المنطوق
على ذا الدلع .. و الزين من يقدر يخونه ؟
ما أسولف معاه إلا و أنا تحت ضغط الشوق
ترا ( الكلمه ) إللي من ورا الشوق ؟ موزونه
كثر ماني أسترسل معه " خارج الصندوق "
أعرف الكلام إللي بـ صدره ؟.. من عيونه
≠ عتيم
الجو جو وشوفك احلى من الجو
الجو رائع وانت من زاد روعه
عقب المطر و الجو هادي و به نو
و البر تحلى التمشيه في ربوعه
اقبل عسى ربي يجيرك من السو
يا مرحبا عقب البطئ والقطوعه
يا ماحلا عقب المطر شبة الضوء
وفنجال من كفك وهرجك قدوعه
دامك معي و المود يعلى و يحلو
والقلب يسلى من همومه تزوعه
يا بو ثمان كنها صف لولو
يامنوة المشتاق لا زاد لوعه
ياضامر السرجوف يادقيق الخو
ياشبه ظبي شاف شي يروعه
ياسعد عين اللي بقربك تهنو
عزالله ان انفوسهم بك قنوعه
≠ محمد بن مرعي
20
549

