MUTWARE Indamutsa Antoine

🚨 URUBYIRUKO MU IBIKORWA BYO GUKUMIRA IMVUGO Z’URWANGO NO GUTEZA IMBERE INDANGAGACIRO Z’UMUCO NYARWANDA 🇷🇼 Ni uruhe ruhare urubyiruko rwagira mu gukumira imvugo z’urwango no kurinda indangagaciro z’umuco Nyarwanda, mu gihe ikoranabuhanga n’imbuga nkoranyambaga bikomeje kugira uruhare rukomeye mu mitekerereze n’imyitwarire y’abantu? Iki ni kimwe mu bibazo biri kuganirwaho mu biganiro bigamije gukumira imvugo z’urwango no kwimakaza indangagaciro z’umuco Nyarwanda mu rubyiruko, rurimo abakoresha imbuga nkoranyambaga, abanyamakuru, abanyamuryango b’amahuriro y’Ubumwe n’Ubudaheranwa muri za kaminuza zo mu Karere ka Musanze ndetse n’abandi bafatanyabikorwa. Urubyiruko ni imbaraga z’iterambere, ubumwe n’amahoro. Ni yo mpamvu ari ingenzi kurwubakira ubushobozi bwo guhangana n’imvugo z’urwango, amakuru ayobya n’ibindi bishobora guhungabanya imibanire myiza n’ubumwe bw’Abanyarwanda. Abitabiriye ibi biganiro barasuzumira hamwe imbogamizi zihari, bungurana ibitekerezo ku bisubizo bishoboka, banagaragaza uruhare rwa buri wese mu kwimakaza indangagaciro nziza, ubwenegihugu burangwa no kuzuza inshingano, ubumwe n’amahoro. Ibi biganiro biri kubera muri @MusanzeCollege, byateguwe na Vision Jeunesse Nouvelle ku bufatanye na @Unity_MemoryRw na @UNDP_Rwanda. Urubyiruko ntirukwiye kuba indorerezi, ahubwo rukwiye kuba imbarutso y’impinduka nziza, rukagira uruhare rufatika mu kubaka ejo hazaza harangwa n’ubumwe, ubudaheranwa n’amahoro. 🇷🇼