أبو عامر.

يا الله ثبتني بطاعتْك … يا الله مثل الجبال الراسيه و المنيفه آمنت بك خوفٍ وحبٍ ومنجاه وبموت وأنا أسعى لصحيفه نظيفه

على الصاحب الغايب سلامٍ معه مشروه يوصّل له لْيا جيت بيته … مع اللفّه مع أني شفوقٍ له وهو ما هو بْـ مسفوه حرام إنّ عقلي شويّ .. ويصير به خفّه قطعني، وأنا ما ألْحقته الشر والمكروه وهو خابر أنه في معاليقي .. مْرفّه خذى قلبي اللي لو يموتون ما وصْلوه وعطاني جفاه اللي سجد بي على الحفّه! -أبو عامر.

يا راعي الجمال اليوسفي والمقام الذرب عيوني على لاماك عجله وملهوفه يغنّي عليك الطير فوق النوامي طرب وصوت المشاعر تعزف لوجهك عْزوفه يحدني عليك الشوق كل ما مزاجي خرب مثل من يحدّه للعرب مُجمل ظروفه لو يحول ما بيني وبينك حروب وضرب .. علي الحرام أن أوصلك لوّ فالكوفه! -أبو عامر.

من يحبك ما لقى فالحب حيله يتبعك مثل البعير اللي مقيّد… واحدن في عالمك وآعزتي له صار لك في كل شي أكبر مؤيّد أدري أن جيتْك عندي مستحيله غير يشفع لك غلاً جدره مشيّد .. باقيٍ حبك ولا أرجي في بديله لو نووا فيك الشماميت اتسيّد والله إن عندي لشوفك كم وسيله لكن أني فأكثر الأشياء متقيّد ! -أبو عامر.

أنا وين أبرسل لك مناديب هوجاسي .. وقلبك مع أهل الصيف ساجج ومتربِّع يعذّر لك الخافق مخافة من أنفاسي! وصدري غدى كله من الضيق متشبِّع عطيتك ثلاث أيام يا اللاهي الناسي أحسبك مع الذعذاع ذاهن ومتتبِّع… لقيتك رغم سوّ النبا تلعب براسي مثل لعبة اللي لا همَل جاك يتسبّع! تعيي على وصلي وياتي بك إحساسي شف الفرق بين الطبع واللي غدى مْطبِّع .. أثر صدة المقفين تشبه خطا الخاسي يحسبون سمحين الخواطر لهم تُبّع! مصير الليال بتذكر أني جبل راسي وغيري تحت سبع الأراضين متقبِّع… -أبو عامر.

بعض السوالف ما لها عندي مقام مثل الردي ما له سوى النبز الردي!! وبعض السوالف مثل تغريد الحمام أصغي ( لراعيها ) .. قبل لا يبتدي للمستوى الراقي مكانة واحترام ولأهل الأنافه منزلة فوق الجدي وللوجه الأطخم روز من بين الأنام يفرق عن العالم فروق العسجدي اللي خلقْه الله جميل وذو قوام تلقى معاه الانبساط الأحمدي…. فارق بتفكيره وشبحه للأمام ماهو يحب الذم لو فالمعتدي! لي صاحبٍ كملْه ربي بالتمام ماخذ جمال الدين بالخلق الهدي درٍ يصافيني على در الكلام كنه يضوّح لي في ليلٍ سرمدي… هو غايتي يوم العرب شرقٍ و شام وحبه سحب صوبه شعوري وجهدي من كثر ما أنظر له بعين الاهتمام ودي من العالم أغطيه بيدي! -أبو عامر.

سحرك الطاغي يسمّونه السحر الحلال وين ما لفيت وجهك يلف معك القبول منت من جيز البشر دام وصفك من خيال أنت من فوق التواصيف وأفكار العقول ما لقيت اللي يوازي حلاك بأي حال .. لا ذهب، لا ألماس، لا جوهرة، لا عقد لول! والله إن زينك لحاله، ولا يقبل جدال من حدود بلاد فارس إلى ما لا يطول…. -أبو عامر

قفّلت باب التشرّه وانقفل صدري قفلٍ حكمته بمفتاحه و مزلاجه بضحك لو أن القهر يومي على قبري! وش لي بحكيٍ وراه الناس هرّاجه في سوق الأيام ذا بايع وذا يشري والموقف الحرج ينهي الفلم واخراجه ما للجفيّا عذر لو طلت في صبري تذبحني الصده و تحرجني الحاجه…. الله ولا طلبة اللي ما حشم قدري مثلي عرف مدخله من قبل مخراجه ظنّيت بعض الأسامي ظلّها يذري واثر السهل و الجبل ما بينها مواجه !! إمّا نصيت الرجال اللي على خبري .. ولاّ على الله علاج الضيق وافراجه -أبو عامر.

الأوادم تالي الوقت من دونٍ لـ دون كنّهم من مآقف الطايله متنازلين!! تصغر الشرهه على اللي يهون وما يكون وتكبر الشرهه على الضلع والجنب المتين لا تدوّر فزعةٍ من ورا اللي يكذبون ما لهم فالطيب طاري ولا هم غانمين… والله أن الطيبين أكثر اللي يفعلون غير صار الوقت ماهو يعين الطيبين وحاجة تنزّل مقامك وتجعلْك مْغبون .. شب فيها النار لو تحرقك وسط الكنين -أبو عامر.

وآكبدي اللي غدت بالوجد منفطره تقول كنها من العربان محرومه من فقدكم يا ضنيني حالتي خطره أشكيك لليل والعبرات مكتومه… شفّي بوصلك شفوف القاع للمطره يوم الرجاوي معك ماهيب معدومه أشره عليك إن ذكرت السيره العطره حتى خيالك تكاشف عندي رسومه .. ما دام حبك معي موجود بالفطره ما والله أكرهْك لو غيبتْك مذمومه ! -أبو عامر.

يا جميله عاد عيدك يا جميله والله يا لولا وجودك ما أعيّد .. من يحبك ما لقى فالحب حيله يتبعك مثل البعير اللي مقيّد… واحدن في عالمك وآعزتي له صار لك في كل شي أكبر مؤيّد دام حبك ظاهرٍ مثل الفضيله تبشرين بشيخ دين ورجل جيّد… أدري أن جيتْك عندي مستحيله غير يشفع لك غلاً جدره مشيّد باقيٍ حبك ولا أرجي في بديله لو نووا فيك الشماميت اتسيّد والله إن عندي لشوفك كم وسيله لكن أني فأكثر الأشياء امتقيّد ! -أبو عامر.

يا مرحبا بالنور واللي ورا النور في مرتعٍ ترقص عليه النواوير .. معْ ضحكة الغنجا ووردٍ لها يْدور طال النظر في شوف سيد الغنادير بنتٍ يحبها القلب ويصد مجبور خوفٍ عليها من صدوف المقادير! أم العيون اللي تخفّت بديجور .. من رمشها زانت عليها التصاوير لا سلهمت: كنها تشرّه من شعور شرهه وراها حب خشم ومعاذير ودها تتل القلب والقلب مطيور ما باقي إلاّ أثبّته بالمسامير ! يا والله أني في هوى الزين مسحور سحرٍ مايلحِقني ملام ومخاسير ما تشبه إلاّ النور فعيونها الحور .. والورد غادي في نحاها مداوير -أبو عامر.

على الصاحب الغايب بيوت الولع طربه وأنا طمعٍ بشوفه وشفقٍ على ملفاه ركونه وسط صدري غدت فالخلا خربه وهي ما دهلها واحدن غير أنا وياه أحبه وقلبي صافي الشوق هستربه مثل واحدن هستر بعد ما التعب بكاه عسى المبعد يجيبه دعاً صادق يقربه يجيني على ودي ولو كان دون رضاه! عطيته حقوق الحب بالكلمه الذربه ألا ليته يقدّرني بجاهي اللي جاه… -أبو عامر.

مع صلاة الفجر والخلق ممسين يزيد رزق الآدمي في مقامه .. يا حظه اللي لِحق باقي المصلين من ركعتينه ما له إلاّ السلامه… -أبو عامر.