Population Council, Pakistan

کل پارلیمنٹرز کے ساتھ آبادی کی مینجمنٹ اور انساني وسائل کی ترقی کے اہم چیلنج پر ایک نہایت سیر حاصل گفتگو ہوئی۔ ہماری وزارت کے لیے تمام شہریوں کی شمولیت، مساوات، اور سماجی و اقتصادی بہبود پر مبنی ترقی کی منصوبہ بندی بنیادی ذمہ داری ہے، لیکن جس رفتار سے ہماری آبادی بڑھ رہی ہے وہ ایک انتہائی اہم چیلنج ہے۔ اندازوں کے مطابق 2035 تک 300 ملین سے تجاوز کر جائے گی، جس پر ہمیں ایمانداری سے غور کرنا ہوگا کہ کیا ہمارے وسائل بھی اسی رفتار سے بڑھ رہے ہیں؟ اس معاملے کی شدید حساسیت اور اہمیت کو مدنظر رکھتے ہوئے، وزیر اعظم شہباز شریف نے قومی آبادی کونسل (National Population Council) قائم کی ہے تاکہ ہم اپنے آبادیاتی رجحانات کو بہتر انداز میں منظم کر سکیں - اس نشست کے دوران، میں نے اس بات پر زور دیا کہ ہمیں اپنے وسائل اور کنبے کے سائز کے درمیان ایک پائیدار توازن برقرار رکھنا ہوگا تاکہ ہر فرد—ہمارے بیٹوں، بیٹیوں اور بالخصوص ماؤں—کے لیے صحت، بہبود اور مساوی مواقع کو یقینی بنایا جا سکے۔ ان کی صحت اور خوشحالی ہماری اولین ترجیح ہونی چاہیے۔ جب ہمارے 40 فیصد بچے اسٹنٹنگ ، یعنی جسمانی طور پر لاغر اور ذہنی طور پر کند، کا شکار ہوں، تو ہم ان سے عالمی معیار کی تخلیقی صلاحیتوں کا مقابلہ کرنے اور ملکی ترقی میں فعال کردار ادا کرنے کی توقع کیسے کر سکتے ہیں؟ میں نے اس نقطے کو بھی نمایاں کیا کہ ہمیں این ایف سی ایوارڈ (NFC Award) پر ترقی پسندانہ انداز میں دوبارہ غور کرنے کی ضرورت ہے تاکہ اسے ہمارے مستقبل کے تقاضوں سے ہم آہنگ بنایا جا سکے۔ آبادی کے رجہان اور انسانی وسائل کی ترقی پر توجہ دینا ایک صحت مند اور مسابقتی پاکستان کی تعمیر کے لیے ناگزیر ہے۔