🦋𝐑ᴀsʜɪᴅᴀʜ🦋

یہ 25 نومبر 1952 کی بات ہے ۔ میری بیوی لیڈی ویلنگٹن ہسپتال لاہور میں داخل تھی ۔ کافی وقت گزر چکا تھا۔ حتیٰ کہ صبح کے نو بج گئے۔ میں نے ناشتہ نہیں کیا ہوا تھا۔ سوچا آج چل کے پوریوں کا ناشتہ کروں ۔ ناشتہ سے فارغ ہوکے لوٹا تو معلوم ہوا کہ بیٹا پیدا ہواہے۔ یعنی عمران تشریف لائے تھے نام کس نے رکھا تھا ۔۔۔۔۔ یہ اچھی طرح سے یاد نہیں غالباً میری بیوی نے یہ نام منتخب کیا تھا۔ ۔ بیٹے کی پیدائش کی خبر سے مجھے بالکل ویسی ہی مسرت کا احساس ہوا جیسی بیٹی کی پیدائش پر ہوتا، مجھے یہ خیال نہیں تھا کہ بیٹا ہی پیدا ہو میری خواہش تھی کہ جو بھی پیدا ہو ، خیریت سے ہو، صحت مند ہو اور اس پر خدا کی رحمت ہو۔ سو مجھے یہ احساس نہ آج ہے نہ پہلے کبھی ہوا کہ یہ میرا اکلوتا بیٹا ہے لہذا مجھے اس کے ساتھ خصوصی لاڈ پیار سے پیش آنا چاہیے ۔ ۔ دلچسپ حقیقت یہ ہے کہ اس کے ناز نخرے اٹھانے کی بجائے میں نے اس کے ساتھ قدرے سختی کا رویہ اپنائے رکھا اور اپنی بیٹیوں کے ساتھ نسبتا نرمی برتی۔ ۔ ایک مزے کی بات بتاتا چلوں ۔ جب عمران ایک سال کا ہوا اس کی ماں برٹ انسٹیٹیوٹ میں منعقد ریڈ کراس کے میلے میں اسے لے گئی ۔ گول مٹول سرخ و سفید اور صحت مند عمران کو صحت مند بچوں میں اول انعام کا حقدار قرار دیا گیا۔ میری بیوی نے اس انعام کے بارے میں جب مجھے بتایا بے ساختہ میرے منہ سے نکلا ۔ IT'S A LUCKY SRART . جب عمران میں کھلونوں سے کھیلنے کی سوجھ بوجھ پیدا ہوئی ، تو اسے سب سے زیادہ دلچسپی مکینو کے کھیل سے تھی ۔ وہ اپنے ننھے ننھے ہاتھوں سے یہ کھیل کھیلتا اور بے حد مسرت محسوس کرتا۔ اور کتنی کتنی دیر اس کھیل میں مگن رہتا۔ آہستہ آہستہ اس کی دلچسپیاں بڑھتی گئیں۔ " کرکٹ " کا کھیل بھی اس کے دائرہ شوق میں داخل ہوگیا۔ ۔ عمران ابھی چھوٹا ہی تھا کہ مجھے لندن جانے کا اتفاق ہوا ۔ عمران اپنی فرمائش کے ساتھ حاضر ہوگیا۔ ۔ آغا جان میرے لئے ایک بیٹ اور کاؤ بوائے سوٹ لائیے گا۔ ۔ یہ اس کی فرمائش تھی ۔ میں نے اس کی فرمائش پوری کردی ۔ بیٹ کا سائز دیکھ کر عمران کی ہنسی نکل گئی۔ " آغا جان یہ تو بے حد چھوٹا ہے۔ آپ بڑا بیٹ لاتے۔" ۔ اس کا اعتراض سن کر میں نے بغور اسے دیکھا اور مسکرا دیا ۔ بیٹ عمران کے لئے چھوٹا نہیں تھا لیکن وہ بڑا بیٹ چاہتا تھا۔ وہ خود کو چھوٹا تصور نہیں کرتا تھا۔ یہ واقعہ عمران کو اب بھی یاد ہے ۔ وہ مجھے یاد دلاتا ہے " یاد ہے آغا جان آپ لندن سے میرے لئے بیٹ لائے تھے لیکن وہ چھوٹا تھا۔" ۔ عمران کی زندگی کے ابتدائی سالوں ہی میں میں نے محسوس کیا اسے خوبصورت لباس کا بے حد شوق ہے۔ وہ بہت صاف ستھرے دیدہ زیب لباس میں ملبوس رہتا تھا۔ بلکہ یوں کہنا چاہیے کہ بنا ٹھنا رہتا تھا۔ میں نے کبھی اسے گندا یا میلا نہیں دیکھا۔ وہ شروع ہی سے بے حد صفائی پسند یے۔ ۔ اکلوتے ہونے کی وجہ سے عمران کو بھائی کی کمی قدرتی طور پر محسوس ہوتی تھی۔ اس کا اظہار اس نے میری سب سے چھوٹی بیٹی عظمیٰ کی پیدائش کے موقع پر کیا۔ اس سے قبل ہمیں معلوم نہ تھا کہ اسے بھائی کی کس قدر خواہش ہے۔ ۔ لاہور کے یو سی ایچ میں میری بیٹی عظمیٰ پیدا ہوئی۔ عمران بھی خاندان کے دیگر افراد کے ہمراہ ہسپتال گیا۔ وہاں پہنچتے ہی اس نے اپنی والدہ سے لڑنا شروع کردیا کہ آپ خود لڑکی ہو اس لئے آپ کو لڑکیاں ہی اچھی لگتی ہیں اور آپ لڑکیاں ہی لاتی ہو۔ پھر بھائی کی کمی اس نے ایسے پوری کی کہ بہنوں کو باؤلنگ بیٹنگ اور فیلڈنگ سکھائی اور ان کے ساتھ کرکٹ کھیلنا شروع کردی۔ ۔ اکرام اللہ نیازی والد عمران خان 10اکتوبر 1987 #موناسکندر ۔