ولا أكبر من ضياع الهقوه وقدر الكبير ان طاح
سوى اللي ما هقيت أفارقه يا لين فارقته
تعابير الوجيه الصامته تستنطق اللماح
عيونك صارحتني في كلام قد تحققته
ما تحمله المشاعر في الخفا تشعر به الارواح
وانا احساسي ماهوب يخونني لا قال صدقته
تغانمني ترى ما عاد باقي لي كثر ما راح
ذبل غصن رطيب وجف ماه وحتت اورقته
على كيفك تبي تشقا معي والا تبي ترتاح
انا حلم لغيرك ما تحقق في ملاحقته
ترى وجيه الليالي وانت داري شاحبه وشحاح
كم اغتالت لها ضحكه ويا كم شمل فرّقته
هقيتك تعتذر وتجي تراضيني وانا دمّاح
يا زين العذر لا من جاء من الغالين في وقته
ولا أكبر من ضياع الهقوه وقدر الكبير ان طاح
سوى اللي ما هقيت أفارقه يا لين فارقته
من يقفي لا يرجّي من وراي استعطفه بـ إلحاح
من يقفي يقفي والسلامه في مرافقته
على ذكرى تزايفها الهبوب وسافية الارباح
سلام السامح اللي معتق جروحه ومعتقته
ما عاد يشوقني ضوح المزون وبرقها اللوّاح
لو انه باقي في خاطري حلمٍ ما حققته
1
8
462


