𝒎𝒒𝒉.. 🌟🌟

أنا متزوجه وزوجي عنده خوي محترم جداً وكل ما يجي يزور زوجي او يحضر عندنا مناسبه عمره ما كان يطالع فيني او يحاول يفتح معي اي سالفه معروف عنه إنه إنسان ملتزم ومحترم وزوجي يحبه كثير ووقف معه في مواقف وظروف كثيرة. من فتره تفاجأت إنه اتصل علي على جوالي مع إن زوجي سبق واتصل عليه من جوالي اكثر من مره. قال لي إنه جايب لزوجي غرض كان طالبه منه فقلت له تمام وشكرته. لكن بعدها بداء يقول لي: أنتِ مثل أختي ولما كنت اكلمه برسميه قال: اي اخت تكلم اخوها بهالرسمية؟ حاولت انهي المكالمه لكنه استمر يفتح مواضيع ويحاول يطول السالفه لين قال لي: شكلك تبين تقفلين. قلت له: إيه انا اجهز الغدا. قال: ابي اذوق طبخك. قلت له: عادي. بعدها قال إنه بيجي اليوم وفاجأني بطلب غريب جداً قال: إذا جيت عندكم ابيك انتِ اللي تفتحين لي الباب. بصراحه طول المكالمه وانا احاول اقنع نفسي إنه يمكن الرقم مو رقمه او يمكن فيه شيء لكن لما بدأ يذكر اسماء من اقاربنا تأكدت إنه هو فعلاً. سألته: ليش تكلمني بهالطريقة؟ انا اللي أعرفه عنك إنك إنسان محترم وعمرك ما كنت تطالع بالحريم او تتعامل معهم بهالأسلوب. رد علي وقال: انا آسف لا تزعلين ما كان قصدي وقفلت معه مباشرة. من يومها وانا مصدومة فيه لأنه كان بنظري من أنظف واحترم الناس اللي اعرفهم وما توقعت ابداً يصدر منه هالكلام. ما قلت لزوجي لأنه تقريباً ما له غير هالخوي وما ابيه ينصدم بأقرب شخص له واكتفيت إني حظرته وانتهى الموضوع. لكن إلى الآن مو قادرة استوعب كيف شخص كنت أشوفه بهالاحترام والالتزام ممكن يتصرف معي بهالطريقة. برأيكم، تصرفت صح لما اكتفيت بالحظر وما قلت لزوجي؟ أو المفروض أصارحه باللي صار حتى لو كان الموضوع بيصدمه؟