Azba Abdullah

حلقہ این اے 154: کہروڑپکا کی اہم شاہراہیں برسوں سے خستہ حالی کا شکار، شہری مشکلات سے دوچار، عوامی نمائندوں کی کارکردگی پر سوالات! حامد اقبال راؤ / ریاست ڈاٹ پی کے کہروڑپکا: حلقہ این اے 154 سے تعلق رکھنے والے وزیرِ مملکت برائے پاور اینڈ پبلک افیئرز عبدالرحمان خان کانجو طویل عرصے سے اس حلقے کی نمائندگی کرتے آ رہے ہیں، تاہم کہروڑپکا شہر کی متعدد اہم شاہراہوں کی خستہ حالی آج بھی ایک سنگین عوامی مسئلہ بنی ہوئی ہے۔ شہر کی اہم ترین شاہراہ میلسی چوک سے چوک میجر اسلم شہید تک گزشتہ کئی برسوں سے ٹوٹ پھوٹ کا شکار ہے۔ چند ماہ قبل اس سڑک کی مرمت کا کام شروع کیا گیا، جس سے شہریوں کو امید پیدا ہوئی کہ شاید اب ان کی مشکلات ختم ہو جائیں گی، لیکن تین ماہ سے زائد عرصہ گزرنے کے باوجود مرمت کا کام دوبارہ شروع نہیں ہو سکا۔ یہی نہیں، کہروڑپکا کا پرانا میلسی روڈ بھی گزشتہ کئی سالوں سے خستہ حالی اور ٹوٹ پھوٹ کا شکار ہے۔ اس کے علاوہ شہر کی دیگر اہم شاہراہوں کی صورتحال بھی توجہ طلب ہے۔ جگہ جگہ گڑھے، اکھڑی ہوئی سڑکیں اور اڑتا ہوا گردوغبار شہریوں کے لیے روزانہ کی بنیاد پر مشکلات پیدا کر رہے ہیں۔ ان سڑکوں سے روزانہ بڑی تعداد میں شہری، موٹر سائیکل سوار، طلبہ، تاجر اور مسافر گزرتے ہیں، جنہیں آمدورفت میں شدید دشواری کا سامنا کرنا پڑتا ہے۔ ٹوٹی پھوٹی سڑکوں کے باعث نہ صرف سفر دشوار ہو چکا ہے بلکہ گردوغبار سے شہریوں کی صحت بھی متاثر ہونے کا خدشہ ہے۔ قابلِ ذکر بات یہ ہے کہ وزیرِ مملکت عبدالرحمان خان کانجو بھی اپنے دورۂ کہروڑپکا کے دوران میلسی چوک سے چوک میجر اسلم شہید والی اسی شاہراہ سے گزرتے ہیں۔ سوال یہ پیدا ہوتا ہے کہ جب عوامی نمائندے خود ان راستوں سے گزرتے ہیں تو پھر ان کی خستہ حالی دور کرنے کے لیے مؤثر اقدامات کیوں نظر نہیں آتے؟ عوامی حلقوں میں یہ سوال بھی اٹھایا جا رہا ہے کہ شاید لگژری گاڑیوں میں سفر کرنے والوں کو ان ٹوٹی پھوٹی سڑکوں پر موٹر سائیکل سواروں، رکشہ ڈرائیوروں اور عام شہریوں کو پیش آنے والی مشکلات کا مکمل اندازہ نہیں ہو پاتا۔ وزیراعلیٰ پنجاب مریم نواز شریف سے اپیل ہے کہ خدارا کہروڑپکا کی خستہ حال شاہراہوں کا فوری نوٹس لیں۔ متعلقہ محکموں سے سڑکوں کی تعمیر و مرمت میں تاخیر کی رپورٹ طلب کی جائے اور وزیرِ مملکت عبدالرحمان خان کانجو سے بھی ان کے حلقے میں درپیش بنیادی عوامی مسائل اور ان کے حل کے لیے کیے گئے اقدامات کی تفصیلات لی جائیں۔ شہریوں کا مطالبہ ہے کہ میلسی چوک سے چوک میجر اسلم شہید تک زیرِ التوا مرمتی کام فوری بحال کیا جائے، پرانے میلسی روڈ کی تعمیر و مرمت کے لیے عملی اقدامات کیے جائیں اور شہر کی دیگر خستہ حال شاہراہوں کی بحالی کے لیے بھی جامع منصوبہ بندی کی جائے۔ آخر کب تک کہروڑپکا کے شہری ٹوٹی پھوٹی سڑکوں، گردوغبار اور سفری مشکلات کا سامنا کرتے رہیں گے؟ کیا حلقے کے عوامی نمائندے اور متعلقہ انتظامیہ ان دیرینہ مسائل کے حل کے لیے کوئی عملی قدم اٹھائیں گے یا شہریوں کو مزید کئی سال انتظار کرنا پڑے گا؟ @MaryamNSharif @CMComplaintCell

چودہ کروڑ چونٹیوں پر ایک نااہل سلیکٹڈ کی انٹرن شپ تو فرعون نے بھی نہیں کروائی تھی۔ ازبا عبداللہ @AzbaAbdullah