Unleashed 2.0

ساحل عدیم کی منطق بھی کمال کی ہے۔ فرماتے ہیں عورت کی تخلیق کا مقصد اللہ تک پہنچنا تھا، لیکن وہ بن سنور کر مردوں تک پہنچنے کی کوشش کر رہی ہے۔ ساحل صاحب! پہلے یہ بتائیے کہ عورت نے آپ کو کب بتایا کہ وہ بن سنور کر مردوں تک پہنچنے نکلی ہے؟ یا آپ نے اپنی طرف سے پوری آدھی آبادی کی نیتوں کا ٹھیکہ اٹھا رکھا ہے؟ عورت لپ اسٹک لگائے تو مرد کو پھنسانے نکلی ہے، اچھا لباس پہنے تو مرد کی توجہ چاہتی ہے، بال سنوارے تو مردوں میں گھسنا چاہتی ہے۔ بھائی، یہ عورت کی نفسیات کا تجزیہ ہے یا آپ کی اپنی خواہشات کی فہرست؟ ہم مرد روز نہاتے ہیں، شیو کرتے ہیں، پرفیوم لگاتے ہیں، اچھے کپڑے پہنتے ہیں۔ تو کیا ہم بھی عورتوں تک پہنچنے کے مشن پر نکلتے ہیں؟ یا اللہ تک پہنچنے کا راستہ صرف عورت کے میک اَپ سے بند ہوتا ہے؟ اصل مسئلہ یہ ہے کہ کچھ آپ جیسے مرد اپنے آپ کو کائنات کا مرکز سمجھ بیٹھے ہیں۔ انہیں لگتا ہے عورت اگر مسکرا بھی دے تو ضرور ان کے لیے مسکرائی ہوگی۔ ساحل صاحب! عورت کے بننے سنورنے سے زیادہ تشویش ناک بات یہ ہے کہ ایک مرد عورت کو دیکھتے ہی اس کی نیت، مقصدِ تخلیق اور خدا سے تعلق تک کا فیصلہ سنا دیتا ہے۔ اور آخری بات! عورت اللہ تک پہنچ رہی ہے یا نہیں، یہ تو معلوم نہیں، لیکن آپ کی گفتگو سن کر لگتا ہے کہ آپ کی ساری توجہ اللہ سے زیادہ عورت کے میک اَپ، لباس اور مردوں میں آنے جانے پر مرکوز ہے۔ عورت کو خدا کا راستہ سمجھانے سے پہلے اپنی سوچ کو عورت کے گرد چکر لگانے سے فارغ کر لیجیے۔